FAQ - Wo Serbach

Za cuzych wosebje zajimawa swojoraznosć Łužicy wobsteji w tym, zo so tu nimo němskeje dalša awtochtona rěč rěči: serbšćina, kotraž słuša do swójby słowjanskich rěčow. Wona je najbliže přiwuzna z čěšćinu, pólšćinu a słowakšćinu, z kotrymiž twori zhromadnje skupinu zapadnosłowjanskich rěčow. Jako němske pomjenowanje za nju trjeba so tradicionelnje nimo "Sorbisch" tež wuraz "Wendisch".

Serbšćina so dźensa hišće w někotrych dźělach Hornjeje a Delnjeje Łužicy wužiwa. Cyle hinaša bě situacija w historiskim času. W dźensnišich krajach Sakska, Saksko-Anhaltska, Durinska, Braniborska a Mecklenburgsko-Předpomorska sydlachu něhdy předewšěm słowjanske kmjeny a rěčachu so słowjanske dialekty. Nětčiša serbšćina je jenički hač do dźensnišeho zachowany słowjanski idiom w Němskej.
...

Serbja we Łužicomaj słyšachu k połobskosłowjanskim kmjenam, kotrež so wot 6. lětstotka sem mjez Wódru a Łobjom / Solawu zasydlichu. Hačrunjež běchu wot 10. lětstotka němskej wyšnosći podćisnjeni, móžachu sej tola swoju etnisku swojoraznosć hač do přitomnosće wobchować.

W zažnym 19. lětstotku wotući pod wliwom rozswětlerstwa a romantiki kaž tež narodneho wozrodźenja pola druhich słowjanskich ludow tež narodne wědomje Łužiskich Serbow.
...

6. lětstotk
W času ćahanja ludow wobsydla słowjanske kmjeny krajinu mjez Baltiskim morjom a srjedźnymi horinami, mjez rěkami Łobjom a Solawu na zapadźe a Wódru-Bobrom-Kwisu na wuchodźe.

631
Serbja so jako »Surbi« w chronice Fredegara prěni króć pisomnje mjenuja.

932
Heinrich I. podćisnje serbskej kmjenaj Łužičanow a Milčanow.

939
Markhrabja Gero da na hosćinje třiceći połobskosłowjanskich wjerchow zabić. Po tym so mnoho słowjanskich kmjenow zběhnje.

1018
W Budyskim měrje mjez Bolesławom Chrobrym a němskim kejžorom Heinrichom II. so teritorijej Łužičanow a Milčanow pólskemu wjerchej za leno přidźělitej (hač do lěta 1031).
...