Suche Leichte Sprache Seite vorlesen Darstellung
 Suche  Leichte Sprache  Seite vorlesen  Darstellung

Warko, Korla Hendrich (1837–1897)

Warko, Karl Heinrich

* 21. 4. 1837 Běła Woda / Weißwasser
† 30. 10. 1897 Rychbach/Hornja Łužica / Reichenbach OL

Wučer, spisowaćel, basnik.

Syn wučerja Jana Warka, bratr Jana Awgusta Warka a Jana Bohuwěra Warka; wučerska preparanda w Mužakowje, 1854–57 wučerski seminar w Bolesławju, 1857–68 wučer w Niedźe, Wukrančicach, Mužakowje a Dźěwinje, 1868–71 seminarski wučer w Rychbachu, 1871–96 wučer a kantor w Myšecach, 1896 na wuměnk, přesydlenje do Rychbacha.
W. wuda 1865 „Deutsche Sprachübungen für wendische Schulen der Oberlausitz“. Tuž złoži swoju funkciju a přewza słužbu we wjesnej wosadźe. W. je so wosebje 1866–71 w basnjenju pospytał. Zwjetša pisaše didaktiske pěsnje za dźěći. Wozjewješe swoje literarne dźěła, tež přełožki z ruskeje a čěskeje rěče, w periodikach kaž Bramborski Serbski Casnik, Łužičan a Pomhaj Bóh. Pisaše w hornjo- a delnjoserbskej rěči.
Běše wot 1866 čłon Maćicy Serbskeje.

DALŠE WOZJ.: „Serbska mać a jeje synk“6 – Bramborski Serbski Casnik 20, 16. 5. 1867; „Marša, přirodna mać“ – Łužičan 8 (1867), 7-12

ŽÓ./LIT.: O. Wićaz, Wučer Jan Warko a jeho štyrjo synojo – Łužica 42 (1927), str. 13-15, 17-19; Mětšk, Chrestomatija, I, str. 265-276

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984

Warko, Johann

* 20. 2. 1800 Hory / Bergen, † 2. 6. 1864 Běła Woda / Weißwasser.
1817–64 wučer w Běłej Wodźe, nimo toho přisahany tołmačer na sudnistwach w Budyšinje, Złym Komorowje, Mužakowje a Zhorjelcu; nan Korle Hendricha, Jana Awgusta a Jana Bohuwěra Warka.

Warko, Jan Awgust / Warko, Johann August
* 26. 7. 1821 Běła Woda / Weißwasser, † 27. 7. 1862 Jabłońc / Gablenz.
Farar, spisowaćel. Syn wučerja Jana Warka, bratr Korle Hendricha Warka a Jan Bohuwěr Warka. 1843–54 domjacy wučer w Šleskej, 1854–55 wokrjesny wikar za ewangelsku cyrkej w Jabłońcu, 1855–62 farar w Jabłońcu.
Plaćeše jako dobry znajer serbskeje rěče, wosebje pak Mužakowskeho dialekta. Dopisowaše runje tak kaž jeho bratr Jan Bohuwěr Warko do prěnich lětnikow Serbskich Nowin mjeńše powěsće. Bě wot 1850 čłon Maćicy Serbskeje.

WOZJ.: F. L. Čelakovskeho Wothłós pěsni ruskich, Praha 1846 (přeł., hromadźe z J. A. Smolerjom) ŽÓ./LIT.: M. Hórnik, Nekrolog – Łužičan 3 (1862), str. 124

Warko, Jan Bohuwěr / Warko, Johann Traugott
* 8. 11. 1826 Běła Woda / Weißwasser, † 7. 9. 1898 Niska / Niesky.
Wučer. Syn wučerja Jana Warka, bratr Korle Hendricha Warka a Jana Awgusta Warka. Dopisowaše runje tak kaž jeho bratr Jan Awgust Warko do prěnich lětnikow Serbskich Nowin mjeńše powěsće.

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984