Jordan, Karlo (1885–1967)

Jordan, Karl

* 22. 5. 1885 Popojce / Papitz
† 3. 5. 1967 Choćebuz / Cottbus
Wučer, narodny prócowar.

Syn Hendricha Jordana, bratr Hajna Jordana; wučerska preparanda a wučerski seminar w Starej Darbni; 1906–10 wučer w Popojcach, 1910–37 we Wusokej pola Wětošowa, 1937–45 w Neuenburgu, po wróćenju do domizny 1945 sekretar Domowiny w Delnjej Łužicy, wot 1949 docent za delnjoserbšćinu na Serbskej ludowej uniwersiće w Chrósće a w Borkowach, wučer na Centralnej serbskej rěčnej šuli w Dešanku.
J. spěchowaše kulturne žiwjenje w Delnjej Łužicy. Wuda serbske spěwy za měšany chór, dopisowaše do delnjoserbskich publikacijow, zběraše serbske knihi a druhe pomniki serbskeje kultury. Skutkowaše aktiwnje w Maśicy Serbskeje a běše wjele lět pokładnik. Wot 1910 bě tež čłon Maćicy Serbskeje. Fašistiske wyšnosće jeho sobu jako prěnjeho delnjoserbskeho prócowarja z domizny wuhnachu. Po 1945 wěnowaše so wosebje wukubłanju delnjoserbskeje młodźiny a skutkowaše aktiwnje w Domowinskich skupinach. 1955–57 bě župan Choćebuskeje župy.

ŽÓ./LIT.: Nekrolog – Rozhlad 17 (1967). 7, str. 273; W. Bjero. 90. narodniny Karla Jordana – Pratyja 1975, str. 51

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984