Kral, Měrćin (1872–1950)

Krahl, Martin

pseudonym Zarěčanski

* 15. 5. 1872 Klukš / Klix
† 15. 2. 1950 Mały Wjelkow / Kleinwelka

Wučer, historikar a rěčewědnik.

1886–92 Krajnostawski wučerski seminar w Budyšinje; 1892–95 pomocny wučer w Minakale, 1895–1933 šulski nawoda w Zarěču, naposledk wyši wučer, 1933 na wuměnk, přesydlenje do Małeho Wjelkowa.
Wědomostne studije wěnowaše K. serbskim stawiznam, wosebje přeslědźenju serbskich wsow Hornjeje Łužicy, słowjanskej etnografiji, mjenowědźe a nic naposledk rěči a pismowstwu Serbow za čas feudalizma. Dale haješe styki z Historiskej komisiju Sakskeje a ze Slědźerskim institutom za slawistiku w Lipsku.
K. skutkowaše jara aktiwnje w narodnych a kulturnych organizacijach, wosebje w Domowinje, wjele lět bě předsyda Towarstwa pomocy za studowacych Serbow a Zjednoćenstwa serbskich wučerjow (1919–33), wospjet nawjedowaše komisije za wudaće serbskich čitankow. Jeho bratr Jan Božidar Kral (Johannes Theodor Krahl) bě wot 1920 wyši šulski radźićel w Budyšinje. Bě wot 1900 čłon Maćicy Serbskeje a dźěłaše wot 1922 we wuběrku sobu.

DALŠE WOZJ.: „Starosć wo narodnosć“ – Serbske Nowiny 94, 33, 8. 2. 1935; „Stawizniske powěsće z našich serbskich wsow“, Budyšin 1935, 1937

ŽÓ./LIT.: O. Wićaz, Wyši wučer M. Kral w Zarěću – Předźenak 1933, str. 39; F. Mětšk, Dwaceći lět po smjerći M. Krala – Rozhlad 20 (1970), 2, str. 61-63

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984