Suche Leichte Sprache Seite vorlesen Darstellung
 Suche  Leichte Sprache  Seite vorlesen  Darstellung

Młynk, Jurij (1927–1971)

Möller, Georg

pseudonym: Delan, Jerzy Kwas

* 13. 4. 1927 Šunow / Schönau
† 16. 6. 1971 Drježdźany / Dresden

Literarny wědomostnik, dr. phil., kulturny organizator, basnik, bibliograf.
Syn skałarja a chěžkarja; 1941–43 wobchodna šula w Kamjencu, 1943–44 tam překupski přistajeny, 1944–1945 wojak; wot nazymy 1945 nowowučer, 1946 dwuměsačny kurs w Serbskim wučerskim wustawje w Radworju, 1946–48 wučer a direktor šule w Ralbicach; 1948–49 studijny předkurs a matura na uniwersiće we Wrocławju, 1949–50 tam studij germanistiki, 1950–53 pokročowanje studija w Lipsku, připódla studij serbšćiny, 1960 promocija; 1953–71 wědomostny sobudźěłaćer w Instituće za serbski ludospyt w Budyšinje, 1970–71 nawoda jeho literarnostawizniskeho wotrjada.
M. wuda dweju zběrkow jeho lyriki („Do swětła“, Budyšin 1955 a „Štož lubuju“, Budyšin 1959) a přebasni poeziju druhich literaturow. Přełožowaše tež prozu. Jako předsyda Koła serbskich spisowaćelow (1960–67) a čłon Němskeho spisowaćelskeho zwjazka zdoby sej M. wulke zasłužby wo rozwiće serbskeje literatury. Zestaja wobrazowy přewodnik po Muzeju za stawizny serbskeho pismowstwa, kotryž bě 1958 w Serbskim domje w Budyšinje zarjadował („400 lět serbskeho pismowstwa“, Budyšin 1960) a pućowanski přewodnik („Serbske pomniki“, Budyšin 1965). Do samsneho wobłuka słušeja jeho „Skicy k stawiznam serbskeje literatury“ (Berlin 1956), jeho wobšěrne sobudźěło na „Serbskim biografiskim słowniku“ (Budyšin 1970) kaž tež zhromadnje z M. Młynkowej spisany zarys „Über das sorbische Schrifttum“ za serbowědnu publikaciju „Die Sorben“.
Wosebity zajim M. plaćeše serbskej literaturje prěnjeje połojcy našeho lětstotka, a na zakładźe monografije wo J. Lorencu-Zalěskim wón promowowaše. Za třeći zwjazk „Stawiznow serbskeho pismowstwa“ spisa wulku wjetšinu pojednanjow wo jednotliwych spisowaćelach. M. wuda dokumentarisce nimoměry hódnu publikaciju „100 lět serbskeho dźiwadła“ (Budyšin 1962). Trajne zasłužby zdoby sej wón tež jako wobdźěłar a wudawaćel serbskeho literarneho herbstwa. Nic mjenje zasłužbne je bibliografiske dźěło.
M. bu 1969 w kolektiwje z Wuměłskim mytom Domowiny wuznamjenjeny.

DALŠE WOZJ.: „Wučbnica za stawizny serbskeje literatury“, 12. lětnik, Berlin 1958; „Jakub Lorenc-Zalěski“, Budyšin 1962; „Serbska literatura kónc 50. a spočatk 60. lět“ (z M. Młynkowej), Budyšin 1963; „Serbska poezija 5 – Jurij Młynk“, Budyšin 1977

ŽÓ./LIT.: P. Nowotny, Nekrolog – Lětopis A 19/1 (1972), str. 1-4; K. Lorenc/T. Bukowa, Bibliografija Jurja Młynka – tež tam, str. 5-17; J. Petr, Nekrolog – Slavia Occidentalis 31 (1974), str. 242-245

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984