Schulenburg, Wilibald von (1847–1934)

* 6. 4. 1847 Berlin
† 29. 3. 1934 Berlin-Zehlendorf

Moler, spisowaćel, ludowědnik, přećel Serbow.

Oficěrske wukubłanje, 1870/71 wobdźělnik Němsko-francoskeje wójny; ćežko zranjeny njemóžeše zbrašenja dla z oficěrskej karieru pokročować a přiwobroći so ludowědźe a wuměłskemu molerstwu.
Sch. pytaše swoje motiwy zwjetša mjez dźěławym ludom na kraju, z kotrymž so spěšnje spřećeli. Přebywajo často a rady w Borkowskich Błótach, nawukny serje serbsku rěč. Z ludoweho erta zapisowaše „Badarakojc molaŕ“ – kaž jemu po hospodarju, hdźež zwjetša w Błótach bydleše – rěkachu, basnički, powědančka, stare podawizny a ludowe pěsnje. Tež dźěło a nałožki wosebje Błótowskich a Slepjanskich Serbow, dźěćace hry a přiwěrki je wopisował a so wobdźělił na prehistoriskich slědźenjach, kiž so pod nawodom R. Virchowa w Delnjej Łužicy přewjedźechu. W serbskej rěči wozjewi mj. dr. „Delnjoserbske a namjezne ludowe pěsnje“ (Časopis Maćicy Serbskeje 1912) a „Spomnjeśa z Błotow“ (Łužica 1931, Pratyja 1931/32). Wulke připóznaće ze strony wědomostnikow namakatej hač do našeho časa jeho němsce spisanej monografiji wo serbskich bajkach a nałožkach a wo serbskim ludstwje. Dalše ludowědne materialije, kiž je Sch. pozdźišo w hižo přeněmčenych, něhdy pak serbskich stronach zezběrał, su za interetniske slědźenja jara hódne.

DALŠE WOZJ.: „Wendische Volkssagen und Gebräuche aus dem Spreewald“, Leipzig 1880, Cottbus 1930; „Wendisches Volkstum in Sage, Brauch und Sitte“, Berlin 1882. Leipzig 1934; „Märkische Kräuterei aus dem Kreise Teltow“ – Brandenburgia 1896/97, str. 127-200; „Innere Volkskunde“ – Landeskunde der Provinz Brandenburg, III, str. 163-261; „Tři lěta pola Badarakec“ – Předźenak 1932, str. 50-53

ŽÓ./LIT.: M. Witkojc, Po stopach kněza Wilibalda ze Schulenburg – Łužica 49 (1936), str. 17-19, 21-23; Mětšk, Chrestomatija, II, str. 213-219; P. Nedo, Badarakojc molaŕ. Wilibald von Schulenburg – nadobny přećel serbskeho ludu – Nowa doba 33, 111, 12. 5. 1979, Předźenak

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984