Suche Leichte Sprache Seite vorlesen Darstellung
 Suche  Leichte Sprache  Seite vorlesen  Darstellung

Sykora, Jan Awgust (1835-1921)

Sickert, Johann August

* 27. 9. 1835 Malešecy / Malschwitz
† 19. 12. 1921 Biskopicy / Bischofswerda

Farar, spisowaćel a ludowědnik.

1848–56 gymnazij w Budyšinje, 1856–60 studij teologije w Lipsku; 1860–63 domjacy wučer, 1863–99 farar w Smělnej, 1899 na wuměnk, přesydlenje do Biskopic.
S. spisa cyły rjad nabožinskich a popularnohistoriskich knihow a wuda je zwjetša w rjedźe Serbskeho lutherskeho knihowneho towarstwa. Kulturnohistoriski charakter matej knize „Dr. Marćin Luther“ (Budyšin 1877) a přełožk „Lěkećanski stary wučer a jeho syn. Wobraz z 30lětneje wójny“ (Budyšin 1893). Pod titulom „Kłosy a zornjatka“ (Budyšin 1908) wozjewi zběrku powědančkow. Jeho basnje, originalne a přełožki, wostachu we wšelakich časopisach rozbrojene. S. běše subsenior Serbskeho (Łužiskeho) prědarskeho towarstwa. Ludowědnje hódny awtobiografiski material wot S. wuda O. Wićaz jako knižku pod titulom „W Malešecach před 100 lětami“ (Budyšin 1936).
S. bě 1861–86 čłon Maćicy Serbskeje.

DALŠE WOZJ.: „Wudowa Linatowa abo zhubjene wopismo“, Budyšin 1875; „Třoje zornjatka za bohate płody“, Budyšin 1875; „Powědančka ze žiwjenja“, Budyšin 1877; „Malešecy před 100 lětami = Malschwitz vor 100 Jahren“ , Budestecy 2008.

ŽÓ./LIT.: O. Wićaz, Smilnanski farar August Sykora – Łužica 48 (1935), str. 33-36; T. Malinkowa, Jan Awgust Sykora – posledni serbski farar w Smělnej – Rozhlad (2010) 9, str. 3-10l.

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984


Autor:
Sykora, Jan Awgust – Sickert, Johann August
Entstehungszeit:
1904
Archivsignatur:
SKA, MS V 4 H