Chóśebuz - 02.09.2022

Kickoff nowego dłujkocasowego slěźaŕskego projekta k serbskim aspektam Dolnołužyskeje kulturneje krajiny

31. awgusta jo se prědny raz zmakał kompletny team na tak pomjenjony “kickoff” nowego dłujkocasowego projekta na Serbskem instituśe, kótaregož połny titel zni: “Digitalny portal k serbskim a łužyskim rěcnym a kulturnym krajinam”. Oficielny zachopjeńk togo projekta jo był na 1. juliju 2022.

We tom projekśe dej serbske kulturne derbstwo w Dolnej Łužycy se wobšyrnje a digitalnje registrěrowaś, wopisaś a slědkoju we wěcejrěcnem online-portalu pśedstajiś. Głowne wótmyslenje projekta jo wědomnostne zběranje datow, jich wobźěłanje kaž teke prezentacija informacijow k serbskim aspektam Dolnołužyskeje kulturneje krajiny ‒ za wědomnostniki, ale teke za interesěrowane luźe a regionalne aktery na pśikład na pólu kulturnego źěła towaristwow, kulturnego kubłanja, kulturnego turizma a kulturnego a kreatiwnego góspodaŕstwa. Na ten part dej serbske rěcne a kulturne derbstwo regiona se widobnjejše wucyniś a tejerownosći se wuchowaś za pśiduce generacije a k jich wužytkoju jim k dispoziciji stojaś.

“Toś ten dłujkocasowy projekt ma ‒ glědajucy na rozměru inwentarizacije a na cas traśa ‒ charakter akademiskego projekta a wón wótwórijo nam móžnosć systematiskego a wobšyrnego zběranja datow. Ja se kradu wjaselim, až jo se raźiło, jen pśez Bramborske projekty k strukturnej změnje zmóžniś”, měni direktor instituta dr. Hauke Bartels. “My se togodla buźomy nejpjerwjej na Dolnu Łužycu koncentrěrowaś, derje wěźecy, až rozšyrjenje projekta wó Górnu Łužycu by było wjelgin wažne, a my buźomy se wó spěchowańske srědnosći za to pilnowaś”.

Team, wobstojecy z jadnab 15 wědomnostnikow/-nicow a projektowych sobuźěłaśerjow/-ŕkow, buźo ten wjeliki projekt nejpjerwjej we pěśich tematiskich źělbach wobźěłaś (“Serbske elementy rěcneje krajiny Dolna Łužyca”, “Serbske swójske mjenja w Dolnej Łužycy”, “Dolnoserbske pismojstwo”, “Materielne znankstwa serbskeje kultury w Dolnej Łužycy” a “Praktiki imaterielnego kulturnego derbstwa w Dolnej Łužycy”). Za šesty źělny projekt wó wósobach a institucijach serbskich kulturnych stawiznow Dolneje Łužyce jo se naźěłała koncepcija, kótaraž ma se pózdźej zwopšawdniś. Teke elementy tak pomjenjoneje citizen science deje se nałožyś, aby aktiwne interesěrowane luźe na měsće zapśěgnuli, na pśikład hobby-slěźarje na pólu mjenjowědy.

Projekt słuša k šesćim serbskim projektam w kraju Bramborska, kótarež se spěchuju ze zwězkowego spěchowańskego programa “Serbska rěc a kultura we procesu strukturneje změny” (glej medijowu powěsć MWFK/SI ze 16.7.2021). Wón jo drugi projekt z togo gjarnca na instituśe, pósporomje załoženja nowego wótźělenja za regionalne wuwiśe a woplěwanje mjeńšynow. Spěchowańske pjenjeze zastoj Załožba za serbski lud. Projekt dej se spěchowaś až do lěta 2031, z 550.000 euro k lětu.

Pśidatne informacije: