\u0179insa (23. januara) stej p\u015bedstaji\u0142ej dr. Astrid Schmiedelowa a Jan M\u011b\u0161kank, r\u011bcyw\u011bdnika w Serbskem institu\u015be, w Budy\u0161ynje aktualny staw wuwi\u015ba serbskeju p\u015bedcyta\u0144skeju funkcijowu. W\u00f3tn\u011bnta stej dolnoserbski g\u0142os “Juro” a g\u00f3rnoserbski “Matej” zjawnje p\u015bistupnej<\/a>. Ta pr\u011bdna wersija jo wa\u017eny mjazywusl\u011bdk sl\u011b\u017aa\u0155skich procowanjow Serbskego instituta, k\u00f3tare\u017e Lichotny stat Sakska z don\u011bnta 700.000 eurow sp\u011bchujo.<\/p>\n Prof. Lechos\u0142aw Jocz, dr. Astrid Schmiedelowa<\/a> a Jan M\u011b\u0161kank<\/a>, w\u011bdomnostne sobu\u017a\u011b\u0142a\u015berje Serbskego instituta, wuwijaju w\u00f3t 2018 p\u015bedcyta\u0144sku funkciju za dolno- a g\u00f3rnoserbsku pisnu r\u011bc<\/a>. Projekt se p\u00f3dp\u011bra ako nap\u0161awa k sp\u011bchowanju inkluzije z dankowych sr\u011bdkow na zak\u0142a\u017ae g\u00f3spoda\u0155skego plana, wobzamknjonego w\u00f3t Sakskego krajnego sejma. Wuprob\u011browanje “Mateja” a “Jura” ako teke dal\u0161ne sl\u011b\u017aa\u0155ske \u017a\u011b\u0142a se nanejmjenjej hy\u0161\u0107i a\u017e do k\u00f3\u0144ca l\u011bta dalej wjedu.<\/p>\n Institutny direktor prof. dr. Hauke Bartels<\/a>: “Sakske sp\u011bchowanje inkluzije jo teke Serbskemu institutoju bytostne k\u0161ace k doj\u015bpi\u015bu b\u017aezbariernos\u0107i, na p\u015bik\u0142ad w institutnem twarjenju a na na\u0161om domacnem boce zm\u00f3\u017eni\u0142o. W\u00f3sebny w\u00f3znam pak ma wuwi\u015be software za awtomatiske p\u015bedcytanje serbskich tekstow. K tomu su nejpjerwjej sl\u011b\u017aenja k fonetice a ortoepiji (to groni k wugronje\u0144skej normje) notne byli. B\u017aez \u0161\u0107odriwego sp\u011bchowanja njeby taki projekt m\u00f3\u017eny by\u0142.”<\/p>\n P\u015bedcyta\u0144ska funkcija p\u00f3l\u011bp\u0161yjo bytostnje b\u017aezbariernu serb\u0161\u0107inu. Dajo se wu\u017eywa\u015b za p\u015becytanje dolno- a g\u00f3rnoserbskich webbokow, ale teke za dw\u00f3rni\u0161\u0107owe p\u015bipow\u011b\u017aenja abo w busach za p\u015bipow\u011b\u017aenje zastani\u0161\u0107ow. L\u011btosa k\u015b\u011b r\u011bcyw\u011bdniki nanejmjenjej hy\u0161\u0107i jadnu dal\u0161nu wersiju Jura a Mateja w\u00f3zjawi\u015b. Z p\u00f3bitowanim dermotneje a na\u0142o\u017eujomneje s\u0142u\u017eby (p\u00f3dla w\u011bdomnostnych w\u00f3zjawjenjow) ma se projekt w\u00f3tzamknu\u015b.<\/p>\n N\u011bnto p\u015bep\u0161osujo Serbski institut wu\u017eywarjow, Jura a Mateja wuprob\u011browa\u015b. Wa\u0161e nazg\u00f3njenja a pokazki p\u00f3sr\u011bdni\u015bo na mejlkowu adresu feedback-juro-matej@serbski-institut.de<\/a>.<\/p>\n P\u015bedcyta\u0144ska funkcija jo (hy\u0161\u0107i we wuwi\u015bowej wokolinje) doj\u015bpijobna p\u00f3d: https:\/\/tts-juro-matej.serbski-institut.de\/<\/a>.<\/p>\n Mimo mjazystawa k wuwi\u015bu serbskeje p\u015bedcyta\u0144skeje funkcije jo Serbski institut 23. januara 2023 prezent\u011browa\u0142 modul “R\u011bcna krajina Sl\u011bpe”<\/a> w serbow\u011bdnem portalu SORABICON. Teke ten projekt jo by\u0142 jano z p\u00f3dp\u011bru Lichotnego stata Sakska we wusokos\u0107i n\u011b\u017ai 260.000 eurow w\u00f3t maja 2019 a\u017e do k\u00f3\u0144ca 2022 m\u00f3\u017eny.<\/p>\n Minister za w\u011bdomnos\u0107 Sebastian Gemkow jo p\u00f3d\u0161marnu\u0142: “Wjaselim se, a\u017e se serbskej zjawnos\u0107i znowego sl\u011b\u017aa\u0155skej projekta p\u015bedstajijotej, k\u00f3tarej\u017e Sakske statne minista\u0155stwo za w\u011bdomnos\u0107, kulturu a turizm sp\u011bchujo. Jo nam wjelgin wa\u017ene, p\u00f3stupy p\u015bi digitalnem zastaranju serbskeje r\u011bcy doj\u015bpi\u015b. Wob\u0161yrne sp\u011bchowanje w\u00f3t p\u015bisamem 1 miliona eurow jo se za to k dispoziciji staji\u0142o. Z tym dajotej se serbska p\u015bedcyta\u0144ska funkcija, ako tak wa\u017eny projekt za inkluziju, ako teke portal w\u011bdy k serbskej r\u011bcnej krajinje Sl\u011bpe zwop\u0161awdni\u015b.”<\/p>\n