Kulturne wědomosće

W kulturnowědomostnym wotrjedźe slědźi so tuchwilnje we dwěmaj ćežišćomaj. Wobě tematiskej ćežišći zaběratej so interdisciplinarnje a přirunujo z prašenjemi zaručenja wěstoty za etniske a rěčne mjeńšiny, kaž tež z transformaciju kulturnych praktikow a towaršnostnych normow pola Serbow a druhich mjeńšinow. Slědźerske ćežišćo „Institucionalizacija“ wobkedźbuje wosebje fazu pospěšeneho institucionelneho a organizatoriskeho wuwića serbskeje eksistency w modernje. Ćežišćo „Žiwjenske wašnja“ rozestaja so ze šansami a wužadanjemi socialnych, kulturnych, politiskich a ekonomiskich přewrótow w zažnym 21. lětstotku. Dalše jednotliwe projekty wěnuja so indiwiduelnym prašenjam, zawěsćeja dołhodobne předewzaća abo słuža krótkodobnym zaměram.