D\u017aensa (23. januara) p\u0159edstaji\u0161taj dr. Astrid Schmiedelowa a Jan M\u011b\u0161kank, r\u011b\u010despytnikaj p\u0159i Serbskim institu\u0107e, w Budy\u0161inje aktualny staw wuwi\u0107a serbskeju p\u0159ed\u010ditanskeju funkcijow. Wotn\u011btka stej hornjoserbski h\u0142\u00f3s “Matej” a delnjoserbski “Juro” zjawnje p\u0159istupnej<\/a>. Tuta pr\u011bnja wersija je wa\u017eny mjezywusl\u011bdk sl\u011bd\u017aerskich pr\u00f3cowanjow Serbskeho instituta, kotre\u017e Swobodny kraj Sakska z dotal 700.000 eurow sp\u011bchuje.<\/p>\n Prof. Lechos\u0142aw Jocz, dr. Astrid Schmiedelowa<\/a> a Jan M\u011b\u0161kank<\/a>, w\u011bdomostni sobud\u017a\u011b\u0142a\u0107erjo Serbskeho instituta, wuwiwaja wot 2018 p\u0159ed\u010ditansku funkciju za delnjo- a hornjoserbsku spisownu r\u011b\u010d<\/a>. Projekt so sp\u011bchuje jako naprawa k sp\u011bchowanju inkluzije z dawkowych sr\u011bdkow na zak\u0142ad\u017ae hospodarskeho plana, wobzamknjeneho wot Sakskeho krajneho sejma. Wupruwowanje “Mateja” a “Jura” ka\u017e te\u017e dal\u0161e sl\u011bd\u017aerske d\u017a\u011b\u0142a so znajmje\u0144\u0161a hi\u0161\u0107e ha\u010d do k\u00f3nca l\u011bta dale wjedu.<\/p>\n Institutny direktor prof. dr. Hauke Bartels<\/a>: “Sakske sp\u011bchowanje inkluzije je te\u017e Serbskemu institutej bytostne kroki k docp\u011b\u0107u bjezbarjernos\u0107e zm\u00f3\u017eni\u0142o, na p\u0159ik\u0142ad w institutnym twarjenju a na na\u0161ej domjacej stronce. Wusahowacy wuznam pak ma wuwi\u0107e software za awtomatiske p\u0159ed\u010ditanje serbskich tekstow. K tomu b\u011bchu najprjedy sl\u011bd\u017aenja k fonetice a ortoepiji, to r\u011bka k wurjekowanskej normje, tr\u011bbne. Bjez wulkomyslneho sp\u011bchowanja njeby tajki projekt m\u00f3\u017eny by\u0142.”<\/p>\n P\u0159ed\u010ditanska funkcija bud\u017ae bjezbarjerny p\u0159istup k serb\u0161\u0107inje bytostnje pol\u011bp\u0161owa\u0107. Wu\u017eiwa\u0107 hod\u017ai so za p\u0159ed\u010ditanje hornjo- a delnjoserbskich webstronow, ale te\u017e za p\u0159ipow\u011bd\u017aenja na dw\u00f3rni\u0161\u0107ach abo w busach za p\u0159ipow\u011bd\u017aenje zastani\u0161\u0107ow. L\u011btsa chced\u017aa r\u011b\u010despytnicy znajmje\u0144\u0161a hi\u0161\u0107e jednu dal\u0161u wersiju Jura a Mateja wozjewi\u0107. Z poskitkom darmotneje a jednorje na\u0142o\u017eujomneje s\u0142u\u017eby (nimo w\u011bdomostnych wozjewjenjow) ma so projekt wotzamkny\u0107.<\/p>\n N\u011btko p\u0159epro\u0161uje Serbski institut wu\u017eiwarjow, zo bychu Jura a Mateja wupruwowali. Wa\u0161e nazhonjenja a pokiwy sposr\u011bdkuj\u0107e na e-mejlowu adresu feedback-juro-matej@serbski-institut.de<\/a>.<\/p>\n P\u0159ed\u010ditanska funkcija je (hi\u0161\u0107e we wuwi\u0107owej wokolinje) docp\u011bjomna pod: https:\/\/tts-juro-matej.serbski-institut.de\/<\/a>.<\/p>\n Nimo mjezystawa k wuwi\u0107u serbskeje p\u0159ed\u010ditanskeje funkcije prezentowa\u0161e Serbski institut 23. januara 2023 modul “R\u011b\u010dna krajina Slepo”<\/a> w serbow\u011bdnym portalu SORABICON. Te\u017e tut\u00f3n projekt<\/a> b\u011b jeno\u017e z podp\u011bru Swobodneho kraja Sakska we wysokos\u0107i n\u011bhd\u017ae 260.000 eurow wot meje 2019 ha\u010d do k\u00f3nca 2022 m\u00f3\u017eny.<\/p>\n Minister za w\u011bdomos\u0107 Sebastian Gemkow pod\u0161m\u00f3rny: “Wjeselu so, zo so serbskej zjawnos\u0107i znowa sl\u011bd\u017aerskej projektaj p\u0159edstajitaj, kotrej\u017e Sakske statne ministerstwo za w\u011bdomos\u0107, kulturu a turizm sp\u011bchuje. Je nam jara wa\u017ene, postupy p\u0159i digitalnym zastaranju serbskeje r\u011b\u010de docp\u011b\u0107. Wob\u0161\u011brne sp\u011bchowanje wot nimale 1 miliona eurow smy za to k dispoziciji stajili. Z tym so serbska p\u0159ed\u010ditanska funkcija, jako tak wa\u017eny projekt za inkluziju, ka\u017e te\u017e portal w\u011bdy k serbskej r\u011b\u010dnej krajinje Slepo zwoprawd\u017aitej.”<\/p>\n