K \u0161tw\u00f3rtemu razej b\u011b Serbski institut sl\u011bd\u017aerkow a sl\u011bd\u017aerjow, kot\u0159i\u017e so w naj\u0161\u011br\u0161im zmysle ze serbskimaj r\u011b\u010domaj, ze serbskej kulturu abo stawiznami zab\u011braja, na zhromadnu wum\u011bnu do Budy\u0161ina p\u0159eprosy\u0142. Woko\u0142o 30 zajimcow je minjeny pjatk a sobotu (30.6.\/1.7.) na 12 p\u0159edno\u0161kow ze \u0161\u011brokeho wob\u0142uka sorabistiki s\u0142ucha\u0142o. R\u011b\u010despyt b\u011b runje tak zastupjeny ka\u017e kulturne w\u011bdomos\u0107e a stawizny. Serbski institut je p\u0159epro\u0161enje \u0161\u011broko roz\u0161\u011bri\u0142 a je dobry woth\u0142\u00f3s wot uniwersitow a institucijow ze w\u0161eje N\u011bmskeje, a te\u017e z \u010c\u011bskeje, d\u00f3sta\u0142.<\/p>\n
Wobd\u017a\u011bli\u0142a je so skupina serb\u0161\u0107inarjow z Techniskeje uniwersity Drje\u017ed\u017aany pod nawodom Lubina Hajduk-Veljkovi\u0107oweje. Dale su mjez druhim dr. Ladislav Futtera z Techniskeje uniwersity w Liberecu, wu\u010der Serbochorwat\u0161\u0107iny Mihailo Jelic z Poruhrskeje uniwersity w Bochumje, absolwentka socialneho d\u017a\u011b\u0142a Karoline Br\u00fctzel z fachoweje wysokeje \u0161ule w Dortmund\u017ae a doktorandka Karoline Schneider z Bauhaus Uniwersity we Weimarje, do \u0141u\u017eicy doj\u011bli.<\/p>\n
W\u011bdomostnica Serbskeho instituta dr. Lubina Malinkowa<\/a> b\u011b p\u0159itomnych wita\u0142a a so zdobom pola swojeje koleginy dr. Theresy Jacobsoweje<\/a> pod\u017aakowa\u0142a, kotra\u017e je zarjadowanje w l\u011b\u0107e 2017 inici\u011browa\u0142a.<\/p>\n Rjad p\u0159edno\u0161kow zahaji\u0142a b\u011b doktorandka War\u0161awskeje uniwersity Sara Mi\u010dkec, z temu “R\u011b\u010dne praktiki a politiki w serbsko-n\u011bmskich sw\u00f3jbach w Hornjej \u0141u\u017eicy”. Na zak\u0142ad\u017ae biografiskich interviewow z j\u011bdna\u0107e sw\u00f3jbami p\u0159epytuje wona, kak a na kotre r\u011b\u010de so \u010d\u0142onojo tutych sw\u00f3jbow dojednaja. Z wulkim zajimom s\u0107\u011bhowachu p\u0159itomni tohorunja w\u011bdomostnicomaj Marleen Schindler a Kerstin Roth z Techniskeje Uniwersity w Drje\u017ed\u017aanach. Wobaj p\u0159epytujetaj serbske sp\u011bwy Bratrowskeje jednoty a kak so tute na tworjenje identity wuskutkuja. Jimaj p\u0159izamkny so Andreas Pankau, w\u011bdomostny sobud\u017a\u011b\u0142a\u0107er Swobodneje uniwersity w Berlinje. Pankau w\u011bnowa\u0161e so syntaksy r\u011b\u010daneje delnjoserb\u0161\u0107iny, analyzowa\u0161e pochad w\u011bstych r\u011b\u010dnych formow a p\u0159irunowa\u0161e je d\u017a\u011blnje z druhimi r\u011b\u010demi. P\u0159i swojich sl\u011bd\u017aenjach z\u0142o\u017euje so na delnjoserbski r\u011b\u010dny korpus<\/a>, ki\u017e je Serbski institut nad\u017a\u011b\u0142a\u0142, a pokaza na tr\u011bbnos\u0107 podobny korpus za hornjoserb\u0161\u0107inu zestaji\u0107.<\/p>\n Eric Iwanski, kotry\u017e d\u017a\u011b\u0142a p\u0159i Institu\u0107e za sakske stawizny a ludow\u011bdu w Drje\u017ed\u017aanach (ISGV) p\u0159epytowa\u0161e w swojim masterskim d\u017a\u011ble p\u0159emjenowanja sydli\u0161\u0107ow w Sakskej za \u010das nacionalsocializma. Zm\u011bna “Wendischcarsdorf” na “Karsdorf” abo “Horka” na “Wehrkirch” su n\u011bkotre z mnohich p\u0159ik\u0142adow, kotre\u017e w\u00f3n naspomni. Wo Serbach za \u010das NDR sl\u011bd\u017ai tuchwilnje doktorandka Lip\u0161\u0107anskeje uniwersity Aleksandra Mandi\u0107. P\u0159i tym p\u0159epytuje wona h\u0142ownje literarne wuwi\u0107a tutoho \u010dasa. Z wulkim zajimom s\u0107\u011bhowachu wobd\u017a\u011blnicy wjed\u017aenju dr. Annett Br\u011bzanec<\/a> po Serbskim kulturnym archiwje<\/a>. Ma\u0107icarka dr. Ines Kellerowa<\/a> p\u0159edstaji p\u0159itomnym d\u017a\u011b\u0142o Ma\u0107icy Serbskeje a wabje\u0161e so za wupisane myta powabi\u0107.<\/p>\n Rjad sobotni\u0161ich p\u0159edno\u0161kow zahaji w\u011bdomostna sobud\u017a\u011b\u0142a\u0107erka Serbskeho instituta Aleksandra Kuringec<\/a>, kotra\u017e zab\u011bra so z feministiskimi hibanjemi etniskich mje\u0144\u0161inow, z wosebitym fokusom na Serbow. P\u0159i tym po\u0107ahuje so wona p\u0159edew\u0161\u011bm na aktualne wuwi\u0107a a p\u0159edstaja \u0161\u011brokos\u0107 pr\u00f3cowanjow na polu runoprawnos\u0107e. Dr. Justyna Michniuk, w\u011bdomostnica, swobodna awtorka a p\u0159e\u0142o\u017eowarka z Cho\u0107ebuza, p\u0159edstaji napra\u0161owanje mjez wu\u010derjemi a kub\u0142arjemi w serbskej Delnjej \u0141u\u017eicy. Na zak\u0142ad\u017ae swojich wusl\u011bdkow sked\u017abnje\u0161e p\u0159itomnych na problemy a wu\u017eadanja na polu serbskeho r\u011b\u010dneho kub\u0142anja. Po jeje s\u0142owach je “w\u0161ojedne kak ma\u0142ka abo wulka r\u011b\u010d je \u2013 k\u00f3\u017eda r\u011b\u010d je h\u00f3dna, zo so wona wobchowa”. (awtor: Jan Bogusz<\/a><\/em>)<\/p>\n