{"id":12348,"date":"2023-08-18T13:38:41","date_gmt":"2023-08-18T11:38:41","guid":{"rendered":"https:\/\/www.serbski-institut.de\/prenje-wusledki-ewaluacije-recneho-stawa-na-serbsko-nemskich-2plus-sulach-predstajili\/"},"modified":"2023-08-23T10:28:24","modified_gmt":"2023-08-23T08:28:24","slug":"prenje-wusledki-ewaluacije-recneho-stawa-na-serbsko-nemskich-2plus-sulach-predstajili","status":"publish","type":"post","link":"https:\/\/www.serbski-institut.de\/os\/prenje-wusledki-ewaluacije-recneho-stawa-na-serbsko-nemskich-2plus-sulach-predstajili\/","title":{"rendered":"Pr\u011bnje wusl\u011bdki ewaluacije r\u011b\u010dneho stawa na serbsko-n\u011bmskich 2plus-\u0161ulach p\u0159edstajili"},"content":{"rendered":"

Na fachowym dnju 2plus srjedu, dnja 16. awgusta w Slepom p\u0159edstaji r\u011b\u010despytnica dr. Jana \u0160o\u0142\u0107ina pr\u011bni raz zjawnje wusl\u011bdki z pilotoweje fazy ewaluacije r\u011b\u010dneho stawa na t\u0159och serbsko-n\u011bmskich \u0161ulach.<\/strong><\/p>\n

L\u011btny forum 2plus je zarjadowanje Sakskeho statneho ministerstwa za kultus a Krajneho zarjada za \u0161ulu a kub\u0142anje w kooperaciji z R\u011b\u010dnym centrumom WITAJ Budy\u0161in, kotre\u017e wotm\u011b so l\u011btsa w N\u011bmsko-serbskim \u0161ulskim kompleksu Slepo. Wusm\u011brjeny je forum na wu\u010derjow, kotrym\u017e ski\u0107a nimo p\u0159edno\u0161kow a d\u017a\u011b\u0142arni\u010dkow platformu za wum\u011bnu.<\/p>\n

L\u011btsa b\u011b\u0161e jedne z centralnych \u0107e\u017ei\u0161\u0107ow zetkanja prezentacija wusl\u011bdkow loni w septembrje zahajeneje ewaluacije r\u011b\u010dneho stawa na serbsko-n\u011bmskich \u0161ulach, kotre\u017e po koncep\u0107e 2plus d\u017a\u011b\u0142aja. Dr. Jana \u0160o\u0142\u0107ina<\/a>, r\u011b\u010despytnica p\u0159i Serbskim institu\u0107e a wjednica projekta, p\u0159edstaji koncept, metodiku ka\u017e te\u017e wubrane wusl\u011bdki z pilotoweje fazy.<\/p>\n

Cy\u0142kownje 109 \u0161ulerjow 9. l\u011btnika Serbskeho gymnazija w Budy\u0161inje, Serbskeje wy\u0161eje \u0161ule “Micha\u0142 H\u00f3rnik” we Worklecach a Serbskeje Wy\u0161eje \u0161ule “Dr. Marja Gr\u00f3lmusec” w Slepom su so w pilotowej fazy dl\u011b\u0161odobneho projekta na zak\u0142ad\u017ae r\u011b\u010dneho certifikata niwowa B1 w hornjoserb\u0161\u0107inje testowali. R\u011b\u010despytnica Jana \u0160o\u0142\u0107ina p\u0159edstaji p\u0159itomnym bytostne wusl\u011bdki rozprawy, kotru\u017e b\u011b projektowa skupina w minjenych m\u011bsacach nad\u017a\u011b\u0142a\u0142a. Nimo toho su so z pomocu napra\u0161nika pr\u011bni raz wubrane r\u011b\u010dnobiografiske daty zb\u011brali, zo bychu so wusl\u011bdki wotpow\u011bdnje zarjadowa\u0107 dali.<\/p>\n

R\u011b\u010dna biografija<\/h3>\n

Pod\u017a\u011bl \u0161ulerjow r\u011b\u010dneje skupiny A, kot\u0159i\u017e wu\u017eiwaja serb\u0161\u0107inu w sw\u00f3jbje a we w\u0161\u011bdnym dnju, wu\u010dinja 45 procentow. Pod\u017a\u011bl \u0161ulerjow z r\u011b\u010dneje skupiny B z m\u011b\u0161anych star\u0161iskich domow wu\u010dinja 24 procentow. A pod\u017a\u011bl \u0161ulerjow z r\u011b\u010dneje skupiny C, pola kotry\u017e je kontaktny \u010das zwjet\u0161a na institucionelne p\u0159iswojenje r\u011b\u010de wobmjezowane, wu\u010dinja 31 procentow.<\/p>\n

Kotry r\u011b\u010dny staw docp\u011bja \u0161ulerki a \u0161ulerjo 8. l\u011btnikow we wob\u0142ukach zrozumjaceho s\u0142uchanja a \u010ditanja, r\u011b\u010denja a pisanja?<\/h3>\n

(W \u0161ulskim l\u011b\u0107e 2022\/23 su so pandemije dla 9. l\u011btniki p\u0159epytowali.)<\/em><\/p>\n

Jana \u0160o\u0142\u0107ina zd\u017a\u011bli, zo je spektrum docp\u011btych dypkow jara \u0161\u011broki. Tak wotpow\u011bduje najwy\u0161a docp\u011bta h\u00f3dnota 79 wot 80 m\u00f3\u017enych dypkow a najni\u0161a 11 dypkam. P\u0159iw\u0161\u011bm posud\u017auja projektowi sobud\u017a\u011b\u0142a\u0107erjo p\u0159er\u011bznu h\u00f3dnotu w\u0161itkich \u0161ulerjow z 59,1 dypkami jako solidnu. Dale wobsw\u011btli r\u011b\u010despytnica w swojim p\u0159edno\u0161ku wusl\u011bdki jednotliwych kompetencnych wob\u0142ukow, kotre\u017e b\u011bchu so we wob\u0142uku ewaluacije pruwowali. Tu zw\u011bs\u0107i projektowa skupina, zo su \u0161ulerjo w zrozumjacym s\u0142y\u0161enju najl\u011bpje wotr\u011bznyli, naj\u0161patni\u0161o w zrozumjacym \u010ditanju. Wuzb\u011bhny\u0107 ma so tohorunja wosebje \u0161\u011broki spektrum wusl\u011bdkow we wob\u0142ukomaj r\u011b\u010denja a pisanja. Tu sahaja wusl\u011bdki wot po\u0142neje li\u010dby dypkow ha\u010d k 0 dypkam.<\/p>\n

Docp\u011bja \u0161ulerki a \u0161ulerjo 8. l\u011btnikow niwow B1 Zhromadneho europskeho referencneho ramika?<\/h3>\n

(z diferencowanymi wuprajenjemi k cy\u0142kownemu wobrazej, \u0161uli, rjadowni a r\u011b\u010dnej skupinje)<\/p>\n

Cy\u0142kownje 71,74% \u0161ulerjow su r\u011b\u010dny certifikat niwowa B1 wobstali, wot toho 51,1% z predikatom “jara derje”, 9,8% z “derje”, a stajnje 5,4% ze “spokojace” a “dosahace”. Nimo toho wu\u0144d\u017ae z rozprawy, zo su w\u0161itcy ma\u0107ernor\u011b\u010dni \u0161ulerjo, potajkim \u0161ulerjo r\u011b\u010dneje skupiny A wobstali. Z r\u011b\u010dneje skupiny B b\u011bchu to 80% \u0161ulerjow a z r\u011b\u010dneje skupiny C 26,67%.<\/p>\n

Facit<\/strong><\/p>\n

“Wusl\u011bdki ewaluacije wobkru\u0107a po m\u011bnjenju na\u0161eje projektoweje skupiny koncept “2plus” jako solidny koncept n\u011bmsko-serbskeho respektiwnje serbsko-n\u011bmskeho p\u0159iswojenja r\u011b\u010de”, zw\u011bs\u0107i Jana \u0160o\u0142\u0107ina.<\/p>\n

Kak dale?<\/strong><\/p>\n

Wusl\u011bdki, kotre\u017e m\u011brja so na jednotliwe \u0161ule, bud\u017ae projektowa skupina w septembrje \u0161ulskointernje p\u0159edstaji\u0107 a rozr\u011b\u010de\u0107. K tomu su w\u011bdomostnicy diferencowane didaktisko-metodiske doporu\u010denja sformulowali.
\nNimo wud\u017a\u011b\u0142anja koncepta za p\u0159ichodny p\u0159echod ewaluacije, chce projektowa skupina p\u0159edew\u0161\u011bm w\u011bste nadawki statistisce p\u0159ed\u017a\u011b\u0142a\u0107, pozb\u011bhowanske instrumenty p\u0159iw\u00f3t\u0159i\u0107, ka\u017e te\u017e digitalne p\u0159ewjed\u017aenje w\u011bstych nadawkow sobu zap\u0159ije\u0107. Wot l\u011bta 2023 sem ma so potom r\u011b\u010dny staw prawid\u0142ownje pola \u0161ulerkow a \u0161ulerjow 8. l\u011btnika zw\u011bs\u0107i\u0107. Potrjechi to sydom \u0161ulow w serbskim sydlenskim rumje we Swobodnym kraju Sakska.<\/p>\n

Pow\u0161itkownje k projektej<\/strong><\/p>\n

Projekt ewaluacije w nadawku Sakskeho ministerstwa za kultus, kotre\u017e je zdobom financielnje sp\u011bchuje, p\u0159ewjedu r\u011b\u010despytnicy Serbskeho instituta w Budy\u0161inje, dr. Janu \u0160o\u0142\u0107inu, dr. Le\u0144ku \u0160o\u0142\u0107ic<\/a> a Jana Bogusza<\/a>. Tohorunja na projek\u0107e wobd\u017a\u011blena je Manuela Smolina, sobud\u017a\u011b\u0142a\u0107erka R\u011b\u010dneho centruma WITAJ<\/a>, kotra\u017e je z jeje teamom mjez druhim za nad\u017a\u011b\u0142anje testow za certific\u011browanja serbskor\u011b\u010dnych kompetencow zamo\u0142wita. Dal\u0161i projektni partnerojo su kub\u0142anscy w\u011bdomostnicy Lip\u0161\u0107anskeje uniwersity prof. Jonas Fl\u00f6ter a Anna Baunackowa ka\u017e te\u017e statistikar dr. Christof Nachtigall z uniwersity w Jenje. Zdobom podp\u011bruje Krajny zarjad za \u0161ulu a kub\u0142anje kompleksne p\u0159epytowanje koncepcionelnje.<\/p>\n