N\u011bhd\u017ae 75 p\u0159ipos\u0142ucharkow a p\u0159ipos\u0142ucharjow je p\u0159epro\u0161enje na mjezynarodnu konferencu pod hes\u0142om “Budy\u0161in, Praha a Rom” w \u010dasu wot 14. ha\u010d do 16. m\u011brca do Budy\u0161ina s\u0107\u011bhowa\u0142o. B\u011b\u0161e to zhromadne zarjadowanje Karloweje uniwersity w Praze a Serbskeho instituta w Budy\u0161inje. 16 serbskich, n\u011bmskich, \u010d\u011bskich a awstriskich referentkow a referentow p\u0159edno\u0161owa\u0161e, mjez druhim Praski stawiznar Jan Zdichynec, kotry\u017e b\u011b schad\u017aowanje sobu organizowa\u0142, ka\u017e te\u017e wum\u011b\u0142stwowy stawiznar Marius Winzeler, direktor Zeleneho wjelba a Br\u00f3njernje Statnych wum\u011b\u0142skich zb\u011brkow w Drje\u017ed\u017aanach. D\u017a\u011bl p\u0159ewodneho programa b\u011b wopyt Budyskeje tachantskeje pok\u0142adnje.<\/p>\n
Wuchad\u017aejo z katolskeje \u0141u\u017eicy stejachu sple\u0107enja a mjezynarodne zwiski cyrkwinskich stawiznow wot za\u017eneho srjed\u017aow\u011bka ha\u010d do moderny w centralnej Europje w srjed\u017ai\u0161\u0107u. Wosebje tematizowachu so r\u011b\u010de, hranicy a kultury p\u0159esahowace wum\u011bnjenske procesy ka\u017e te\u017e transfer \u010d\u0142owjekow, objektow a w\u011bdy. Katolska \u0141u\u017eica b\u011b wusko ze susodnymaj regionomaj \u010c\u011bska a \u0160leska zwjazana a p\u0159ez cyrkwinske institucije ka\u017e kl\u00f3\u0161traj Marijina hw\u011bzda a Marijiny do\u0142 abo Budyske tachantstwo kru\u0107e do mjezynarodnych katolskich strukturow zap\u0159ijata.<\/p>\n
Po tym, zo je Friedrich Pollack<\/a>, wotrjadnik kulturne w\u011bdomos\u0107e, hos\u0107i konferency powita\u0142, zahaji Alexander Sembdner z Lipska z p\u0159edno\u0161kom wo w\u011brje w\u0161\u011bdneho dnja we \u0141u\u017eiskim p\u00f3zdnim srjed\u017aow\u011bku zarjadowanje. Po\u0107ahowa\u0161e so p\u0159i tym na \u017e\u00f3r\u0142a z Vatikana. Dal\u0161e temy b\u011bchu rekatolizacija \u0141u\u017eicy, wid z Jend\u017aelskeje na \u0141u\u017eiskich katolikow abo z napjatos\u0107emi po\u0107e\u017eowany po\u0107ah mjez biskopom Schreiberom a katolskimi Serbami. Pjatk dopo\u0142dnja steje\u0161e kl\u00f3\u0161ter Marijina hw\u011bzda w srjed\u017ai\u0161\u0107u zarjadowanja. Sotra Tadeja Zelnakec z kl\u00f3\u0161tra Marijina hw\u011bzda ski\u0107e\u0161e dohlad do sw\u011bta cisterciensow w za\u017enym nowow\u011bku a Marius Winzeler z Drje\u017ed\u017aan rozprawje\u0161e wo materielnych sw\u011bdkach (potajkim skulpturach, wobrazach, twarskich objektach atd.) w kl\u00f3\u0161trach barokoweje doby. Dal\u0161e p\u0159edno\u0161ki w\u011bnowachu so Jezuitam a jich wliwej na \u0141u\u017eicu ka\u017e te\u017e Praskemu Serbskemu seminarej jako centralnemu m\u011bstnu wum\u011bny mjez \u010c\u011bskej a Hornjej \u0141u\u017eicu. Birgit Mizscherlich z Budy\u0161ina p\u0159edno\u0161owa\u0161e wo \u017eiwjenju Franca P\u0159ihonskeho, kotry\u017e b\u011b w Praze a Budy\u0161inje skutkowa\u0142, Annett Br\u011bzanec<\/a> prezentowa\u0161e d\u017aeniki serbskeho studentskeho zhromad\u017aenstwa “Serbowka”<\/a>. Dal\u0161ej p\u0159edno\u0161kaj z\u0142o\u017ei\u0161tej ked\u017abnos\u0107 hi\u0161\u0107e raz na m\u011bsta Rom. Tamara Scheer z Wiena p\u0159epytowa\u0161e serbske stawizny n\u011bmskeje narodneje cyrkwje Santa Maria dell\u00b4Anima w Romje a Lubina Malinkowa<\/a> z Budy\u0161in p\u0159edstaji rukopisny d\u017aenik m\u0142ynskeho mi\u0161tra Jurja Wawrika, ki\u017e b\u011b\u0161e w l\u011b\u0107e 1842 z Kukowa do Roma putnikowa\u0142.<\/p>\n Konferenca bu wot N\u011bmsko-\u010c\u011bskeho fondsa p\u0159ichoda sp\u011bchowana.<\/em><\/p>\n