{"id":7213,"date":"2022-03-07T15:51:05","date_gmt":"2022-03-07T14:51:05","guid":{"rendered":"https:\/\/www.serbski-institut.de\/recespytnik-serbskeho-instituta-na-profesora-powolany\/"},"modified":"2022-03-07T15:51:05","modified_gmt":"2022-03-07T14:51:05","slug":"recespytnik-serbskeho-instituta-na-profesora-powolany","status":"publish","type":"post","link":"https:\/\/www.serbski-institut.de\/os\/recespytnik-serbskeho-instituta-na-profesora-powolany\/","title":{"rendered":"R\u011b\u010despytnik Serbskeho instituta na profesora powo\u0142any"},"content":{"rendered":"

Slawist a priwatny docent dr. Thomas Menzel w Serbskim institu\u0107e w Budy\u0161inje bu 30. oktobra wot prezidenta Oldenburgskeje Uniwersity Carla von Ossietzkeho, prof. dr. Pipera, na nimorjadneho profesora powo\u0142any.<\/p>\n

Wot 1995 je r\u011b\u010despytnik Thomas Menzel w\u011bdomostny sobud\u017a\u011b\u0142a\u0107er na w\u0161elakich uniwersitach w n\u011bmskor\u011b\u010dnym rumje, najprjedy w Oldenburgu, pozd\u017ai\u0161o te\u017e w Greifswald\u017ae a Regensburgu. We Freiburgu a Wienje je r\u011b\u010despytne profesury zastupowa\u0142. Thomas Menzel je sl\u011bd\u017aerske projekty k r\u011b\u010dnym zm\u011bnam w morfologiji a syntaksy s\u0142owjanskich r\u011b\u010dow, k n\u011bmskim po\u017e\u010donkam w p\u00f3l\u0161\u0107inje a jeje dialektach a k r\u011b\u010dnemu kontaktej mje\u0144\u0161inowych r\u011b\u010dow p\u0159ewjed\u0142. Poski\u0107a \u010ditanja a seminary wo kulturnych stawiznach s\u0142owjanskich ludow, wo p\u00f3lskej a ruskej gramatice a r\u011b\u010dnych stawiznach ka\u017e te\u017e wo s\u0142owjanskich mje\u0144\u0161inowych r\u011b\u010dach, mjez druhim ka\u0161ub\u0161\u0107inje, rusin\u0161\u0107inje a burgenlandskej chorwat\u0161\u0107inje. 53-l\u011btny Thomas Menzel d\u017a\u011b\u0142a wot l\u011bta 2016 w Serbskim institu\u0107e w Budy\u0161inje we wotrjed\u017ae za r\u011b\u010despyt.<\/p>\n

Prof. dr. Gun-Britt Kohler, direktorka Instituta za slawistiku w Oldenburgu h\u00f3dno\u0107i sl\u011bd\u017aenje Menzela: “W\u011bdomostny profil knjeza dr. Menzela wuznamjenja so najprjedy j\u00f3nu na wusahowace wa\u0161nje p\u0159ez swoju nimorjadnu \u0161\u011brokos\u0107, kotra\u017e je nimale jeho j\u00f3nkr\u00f3tne znamjo. W\u00f3n s\u0142u\u0161a k ma\u0142ej li\u010dbje m\u0142\u00f3d\u0161ich slawistkow a slawistow, kot\u0159i\u017e su wo wjace ha\u010d dw\u011bmaj s\u0142owjanskimaj r\u011b\u010domaj publikowali \u2013 p\u00f3l\u0161\u0107ina, ru\u0161\u0107ina, ukrain\u0161\u0107ina, b\u011b\u0142oru\u0161\u0107ina, \u0142emkow\u0161\u0107ina, serbi\u0161\u0107ina, chorwat\u0161\u0107ina, ka\u0161ub\u0161\u0107ina, hornjo- a delnjoserb\u0161\u0107ina.”<\/p>\n

Wot l\u011bta 2017 d\u017a\u011b\u0142a Thomas Menzel, nimo swojeho sl\u011bd\u017aenja k serbskej gramatice, na sorabistiskim p\u0159ino\u0161ku za S\u0142owjanski r\u011b\u010dny atlas Mjezynarodneho komiteja slawistow sobu. Tut\u00f3n r\u011b\u010dny atlas je do\u0142hodobny multilateralny sl\u011bd\u017aerski projekt s\u0142owjanskich krajow a N\u011bmskeje. Je to pr\u011bnje makrodialektologiske p\u0159edewza\u0107e, kotre\u017e zjima informacije wo dialektnych rozd\u017a\u011blach we wob\u0142uku cy\u0142eje r\u011b\u010dneje sw\u00f3jby.<\/p>\n

Wot l\u011bta 2018 je Thomas Menzel te\u017e sobustaw Komisije za s\u0142owjanske r\u011b\u010dne kontakty p\u0159i Mjezynarodnym komiteju slawistow. Komisija so zab\u011bra z wliwom, kotry\u017e ma kontaktna abo susodna r\u011b\u010d na gramatiku a s\u0142owosk\u0142ad p\u0159epytowaneje r\u011b\u010de. Wot l\u011bta 2020 zastupuje Menzel Serbow w Mjezynarodnym komiteju slawistow, kotry\u017e wuhotuje k\u00f3\u017ede pje\u0107 l\u011bt Mjezynarodny kongres slawistow.<\/p>\n

Te\u017e direktor Serbskeho instituta, dr. Hauke Bartels, wjeseli so p\u0159ez spo\u017e\u010denje titula: “Je wa\u017ene, so ze sorabistiskim r\u011b\u010despytom p\u0159eco te\u017e we wjet\u0161im konteks\u0107e slawistiki zab\u011bra\u0107. Runje w tutym wob\u0142uku wudospo\u0142nja cy\u0142kowny profil Thomasa Menzela idealnje r\u011b\u010despytny wotrjad Serbskeho instituta. Wjeselu so, zo smy jeho za sorabistiku doby\u0107 m\u00f3hli a zo d\u00f3stanu jeho sl\u011bd\u017aenja z nowym titulom p\u0159ip\u00f3zna\u0107e. Ze swojim wuwu\u010dowanjom bud\u017ae dale zajim za Serbow a serb\u0161\u0107inu bud\u017ai\u0107 m\u00f3c.”<\/p>\n

Prof. dr. Gerd Hentschel, n\u011bhdy doktorski nan priwatneho docenta dr. Thomasa Menzela w Institu\u0107e za slawistiku w Oldenburgu: “Na m\u011bstno wu\u010dersko-\u0161ulerskeho po\u0107aha je ch\u011btro sp\u011b\u0161nje kolegialny pom\u011br stupi\u0142, kotry\u017e so naposled w lis\u0107inje zhromadnych publikacijow \u0161piheluje. Thomas Menzel zwjazuje p\u0159ik\u0142adnje profundne a \u0161\u011broke znajomos\u0107e s\u0142owjanskich r\u011b\u010dow w arealnym a chronologiskim nastupanju z teoretiskej orientaciju w modernym r\u011b\u010despy\u0107e. W\u00f3n je narodnje a mjezynarodnje p\u0159ip\u00f3znaty a za Oldenburgsku slawistiku a \u2013 ka\u017e so nad\u017aijam \u2013 te\u017e za jeho n\u011bt\u010di\u0161u akademisku domiznu, Serbski institut, dobra wizitka.”<\/p>\n

Thomas Menzel bydli n\u011btko \u0161tyri l\u011bta we \u0141u\u017eicy a r\u011b\u010di mjeztym hornjoserbsce.<\/p>\n

Dal\u0161e informacije (z publikaciskej lis\u0107inu)<\/h2>\n