(Slědźerski) praktikum

Serbski institut poskića městna za praktikum we wšěch dźěłowych wobłukach instituta (slědźerske wotrjady, centralna biblioteka, kulturny archiw, wědomostna komunikacija, zjawnostne dźěło) na woběmaj stejišćomaj instituta – w Budyšinje a Choćebuzu.

Narěčane su předewšěm studowacy na polu stawiznow, kulturnych a socialnych wědomosćow, rěčespyta, bibliotekskich a informaciskich wědomosćow kaž tež na polu digital humanities a podobnych předmjetow. Wuchadźejo z wosobinskich znajomosćow a zajimow poskića Serbski institut wjelestronske a wotměnjace polo nadawkow we wobłukach slědźenja, projektoweho managementa, wědomostneje komunikacije a zjawnostneho dźěła.

Wot požadarjow/požadarkow wočakuje so zajim za dźěłowe pola Serbskeho instituta. Znajomosće serbšćiny abo druhich słowjanskich rěčow su witane, tola njejsu z wuměnjenjom. Wočakuja Was angažowany team a putace nazhonjenja w jónkrótnej interdisciplinarnej dźěłowej wokolinje.

Praktika w Serbskim instituće so njepłaća. Časowy wobjim a dźěłowe časy móža so indiwidualnje dojednać.