Regionalne wuwiće a mjeńšinowy škit
Nowy wotrjad za regionalne wuwiće a mjeńšinowy škit tematizuje serbske žiwjenje z poćahom na přitomnosć w procesu towaršnostnych změnow. Wón přepytuje wuskutki tutych změnow na serbsku mjeńšinu a přewodźa a podpěruje přiměrjenske strategije Serbow. Dźěło wotrjada za regionalne wuwiće a mjeńšinowy škit poćahuje so potajkim na politiku a jednanje.
Wotrjad koncentruje so předewšěm na dwaj dźěłowej wobłukaj: rewitalizaciju serbskeje rěče a walorizaciju serbskeje kultury. Jeho sobudźěłaćerjo dźěłaja wusko ze wšěmi wažnymi zajimowymi skupinami a lokalnymi akterami hromadźe. K tomu organizuja z nimi wobdźělenske procesy a podpěruja je ze swójskimi slědźenjemi. Wažny wobstatk dźěła je nimo toho systematiske a wobšěrne, mjezynarodnje přirunowace mjeńšinowe slědźenje.
Je zdobom cil, wot mjezynarodnych nazhonjenjow wuknyć kaž tež wjace hač dotal k mjezynarodnemu mjeńšinowemu slědźenju přinošować.
Přez wuraznu orientaciju na nałožowanje je metodiske ćežišćo monitoring a ewaluacija naprawow za spěchowanje serbskeje kultury a rěče. Z tym zesylni Serbski institut swoju kompetencu za na ewidency bazowace poradźowanje politiki.
Prašenja wotrjada za regionalne wuwiće a mjeńšinowy škit nastupaja najwšelakoriše prawniske, planowanske, hospodarske, kubłanske a dalše aspekty, kotrež njemóža so wšitke w Serbskim instituće wobdźěłać. Tohodla słuša k nadawkam wotrjada dalewuwiwanje zhromadneho dźěła z wědomostnymi institucijemi w regionje kaž tež narodneho a mjezynarodneho splećenja.
Projekt spěchuje so wot Załožby za serbski lud přez srědki Zwjazkoweho ministerstwa za nutřkowne a domiznu na zakładźe wobzamknjenja Zwjazkoweho sejma.
https://www.bmi.bund.de/DE/startseite/startseite-node.html
https://stiftung.sorben.com/deutsch/