Regionalne wuwiśe a mjeńšynowy šćit
Nowe wótźělenje za regionalne wuwiśe a mjeńšynowy šćit tematizěrujo serbske žywjenje z póśěgom na pśibytnosć w procesu towarišnostnych změnow. Wóno pśepytujo wustatkowanje tych změnow na serbsku mjeńšynu, pśewóźujo a pódpěrujo serbske strategije za pśiměrjenje. Źěło wótźělenja za „regionalne wuwiśe a mjeńšynowy šćit“ póśěgujo se stakim na politiku a jadnanje.
Wótźělenje se koncentrěrujo pśedewšym na dwa źěłowej wobceŕka: rewitalizaciju serbskeje rěcy a walorizaciju serbskeje kultury. Jogo sobuźěłaśerje źěłaju wusko ze wšyknymi wažnymi zajmowymi kupkami a lokalnymi akterami gromaźe. K tomu organizěruju z nimi wobźěleńske procese a pódpěruju je ze swójskimi slěźenjami. Wažny wobstatk jich źěła jo mimo togo systematiske a wobšyrne, mjazynarodnje pśirownujuce mjeńšynowe slěźenje. Jo rownocasnje cel, wót mjazynarodnych nazgónjenjow wuknuś, ako teke wěcej ako doněnta ze swójim slěźenim k mjazynarodnemu mjeńšynowemu slěźenju pśinosowaś.
Pśez wuraznu orientaciju na nałožowanje jo metodiske śěžyšćo monitoring a ewaluacija napšawow za spěchowanje serbskeje kultury a rěcy. Z tym zmócnijo Serbski institut swóju kompetencu za na ewidency bazěrujuce póraźowanje politiki.
Pšašanja wótźělenja za regionalne wuwiśe a mjeńšynowy šćit nastupaju wjelerake pšawniske, planowańske, góspodaŕske, kubłańske a dalšne aspekty, kótarež njamógu se wšykne na Serbskem instituśe wobźěłaś. Togodla słuša k nadawkam wótźěłenja, zgromadne źěło z wědomnostnymi institucijami w regionje ako teke narodne a mjazynarodne zwězanje do seśi dalej wuwijaś.
Projekt se spěchujo wót Załožby za serbski lud pśez srědki Zwězkowego ministaŕstwa za nutśikowne a domownju na zakłaźe wobzamknjenja Zwězkowego sejma.
https://www.bmi.bund.de/DE/startseite/startseite-node.html
https://stiftung.sorben.com/deutsch/