Projekt DFG “Wobstatkowe knigły a archiwaliske žrědła: digitalizacija a nadrobne wopisowanje zawóstajeństwa Bogumiła Šwjele”
Bogumił Šwjela / Gotthold Schwela (1873 – 1948)
Bogumił Šwjela jo był pśez swój žywjenjoběg a swoje statkowanje signifikantny zastupnik serbskego bergaŕstwa 20. stolěśa. Šwjela jo se naroźił 1873 ako syn wejsańskego wucabnika a „casnikarja“ Kita Šwjele (1836 – 1922), jo teologiju a slawistiku w Barlinju studěrował a bu faraŕ w serbskej Dołnej Łužycy. Mimo swójogo pówołanja jo statkował ako rěcywědnik, publicist, spisowaśel a pśełožowaŕ a teke ako kulturny politikaŕ. Wón jo wumrěł w maju 1948.
Žedne druge zawostajenstwo w SKA ze žywjeńskego casa Šwjele (kejžorstwo, Weimarska republika, NS-režim) póbitujo taku kompaktnu dokumentaciju dolnoserbskeje rěcy, wšedneje kultury a procowanjow wó zdźaržanje a dalejwuwiśe serbstwa. Jogo pisomne derbstwo wopśimjejo zběrki dokumentow k statnej a cerkwinej politice napśeśiwo Serbam, k organizaciji serbskego kulturnego žywjenja, rěcnohistoriske zběrki k stroninim, familijowym a městnostnym mjenjam, k gramatice a teke zběrku słowow a rěčnych wobrotow za dolnoserbski słownik. Pśewšo wjelebocna jo jogo korespondenca, w kótarejž se wopśimjeśowe śěžyšća zawóstajeństwa na rowninje akterow zasej namakaju.
Wót 1. oktobra 2020 jo se zawóstajeństwo Šwjele (a teke zawóstajeństwo jogo nana Kita Šwjele) digitalizěrowało a nadrobnje wopisowało. Projekt jo se 18 mjasecow wót Nimskego slěźaŕskego zjadnośeństwa DFG ze 111.000 euro financěrował w ramiku spěchowańskego programa „Digitalizacija a spśistupnjenje“ (Wědomnostne literarne zastaranske a informaciske systemy). Projekt jo se kóńc měrca 2022 zakóńcył.
Zaměr projekta jo, informacije a wobrazy toś tych rukopisnych žrědłow pśez katalog awtografow a zawóstajeństwow Kalliope a teke w portalu Serbskego instituta SORABICON spśistupniś.
GEPRIS – wót DFG spěchowane projekty
Wobstatkowe knigły w katalogu Kalliope
- zapis wopśimjeśa zawóstajeństwa Bogumiła Šwjele / Gotthold Schwela
- zapis wopśimjeśa zawóstajeństwa Kita Šwjele / Christian Schwela
Wobstatkowe knigły w portalu SORABICON
Projektowe sobuźěłaśerje 10 / 2020 – 3 / 2022
Dr. Peter Jahn-Bresan – wopisowanje dokumentow a zapisowanje datow
Jan Kral – digitalizacija wobrazow dokumentow a techniske źěła