Suche Leichte Sprache Seite vorlesen Darstellung
 Suche  Leichte Sprache  Seite vorlesen  Darstellung

Jenč, Rudolf (1903–1979)

Jentsch, Rudolf

* 30. 8. 1903 Budyšin / Bautzen
† 5. 4. 1979 Budyšin / Bautzen

Literarny historikar a rěčespytnik, kulturny prócowar, dr. phil.

1917–24 Krajnostawski wučerski seminar w Budyšinje; 1924–25 wučer a kantor we Worcynju, 1925–34 w Poršicach, 1934–40 w Budestecach, 1940–45 wojak a we wójnskim zajeću, 1946–48 přistajeny Domowiny, 1948–49 wučer na Serbskim realnym gymnaziju we Varnsdorfje, 1949–51 sekretar wědomostneho wotrjada Domowiny, 1951–68 wědomostny sobudźěłaćer w Instituće za serbski ludospyt, 1968 na wuměnk.
J. zahaji slědźerske dźěło na polu literarnych stawiznow a serbskeho rěčespyta we wobłuku Instituta za serbski ludospyt, kotrehož wotrjad za rěč a literaturu wón nawjedowaše wot 1951 do 1968. Wón napisa standardne dźěło wo serbskej literaturje „Stawizny serbskeho pismowstwa“, I-II (Budyšin 1954, 1960), wobsahowace jeje wuwiće hač do prěnjeje swětoweje wójny; zorganizowa a zahaji dźěło na němsko-hornjoserbskim słowniku a na gramatice hornjoserbskeje spisowneje rěče. Wot 1951 do 1968 nawjedowaše dźěło Rěčespytneje komisije resp. Hornjoserbskeje rěčespytneje komisije. Nawjedowaše tež dźěło terminologiskeje komisije, podgremija Hornjoserbskeje rěčneje komisije, kotraž je serbsku wersiju wulkeje ličby fachowych terminologijow wobdźěłała („Ratarska terminologija“, Budyšin 1966 a serbski dźěl „Slovníka slovanské lingvistické terminologie“, Praha 1977–79). J. bě sobustaw Mjezynarodneho komiteja slawistow. Jako dobry znajer klasiskeje filologije wopokaza so při přihotowanju kritiskeho wudaća přełožka Theokritowych pastyrskich pěsnjow a Phaedrusowych fablow K. F. Stempela. J. bě nawjedowar chórow, organist a spěwar, mjez druhim w chórje Bj. Krawca Lumir. Bě wot 1923 čłon Maćicy Serbskeje.

DALŠE WOZJ.: „K tworjenju nowych terminow w serbšćinje“ – Lětopis A 9 (1960), str. 35-54; „K prašenju normy w hornjoserbskej spisownej rěči“ – Serbska šula 17 (1964), 4, str. 247-254; 5, str. 309-317; „Tezy k substantiwej“ – Lětopis A 15/1 (1966), str. 70-97

ŽÓ./LIT.: F. Michałk, Nestor serbskeho rěčespyta a literarnych stawiznow – Nowa Doba 32, 200, 26. 8. 1978, Předźenak; P. Nowotny, Za drom. Rudolfom Jenčom – Lětopis A 26/2 (1979), str. 213-216

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984