Suche Leichte Sprache Seite vorlesen Darstellung
 Suche  Leichte Sprache  Seite vorlesen  Darstellung

Młynkowa (Brězanec), Marja (1934–1971)

Möller, Maria

rodź. Brězanec

* 1. 2. 1934 Thommendorf
† 27. 2. 1971 Budyšin / Bautzen

Lektorka, spisowaćelka, literarna kritikarka.

1947–49 Serbski realny gymnazij we Varnsdorfje, 1949–52 Serbska wyša šula w Budyšinje, 1952–55 studij germanistiki a pedagogiki w Lipsku; 1955–58 wědomostna redaktorka redakcije serbske wučbnicy nakładnistwa Volk und Wissen, 1957 zmandźelenje z Jurjom Młynkom, 1958–60 lektorka za rjanu literaturu w Ludowym nakładnistwje Domowina, 1960–1971 swobodna spisowaćelka a recensentka.
M. pisaše krótkopowědančka a skicy, kotrež so w nowinach a časopisach wozjewjachu. Najdokonjaniše wuńdźechu w zběrkomaj „Kostrjanc a čerwjeny mak“ (Budyšin 1965) a „Za płotom“ (Budyšin 1977). Awtorcyne wuměłsce najzrališe dźěło je roman „Dny w dalinje“ (Budyšin 1967). Jeje wuměłsce rozdźělnje radźene twórby dźěćaceje literatury wuńdźechu w zběrce „Dundak Matej“.
Wulke zasłužby doby sej M. ze swojimi prawidłownymi recensijemi, kotrychž wuběr wobsahuje knižka „Z wótrym wóčkom“ (Budyšin 1973).
M. spožči so 1968 a 1971 (postum) Literarne myto Domowiny.

DALŠE WOZJ.: „Jakub Bart-Ćišinski. Ein Dichter des sorbischen Volkes“, Bautzen 1956; „Dny v dálce“, Praha 1973; „Dni v dial´ke“, Košice 1984

ŽÓ./LIT.: R. Wěrikowa, Specifika prozy Marje Młynkoweje – Rozhlad 19 (1969), 2, str. 56-64; P. Völkel, Nekrolog – Rozhlad 21 (1971), 4, str. 158-160; F. Šěn, Swojorazna serbska spisowaćelka – Rozhlad 26 (1976), 2, str. 55-58; Žur, Komuž muza pjero wodźi, str. 210-217

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984