Suche Leichte Sprache Seite vorlesen Darstellung
 Suche  Leichte Sprache  Seite vorlesen  Darstellung

Šewčik, Jakub (1867–1935)

Schewtschik, Jacob

* 6. 9. 1867 Baćoń / Storcha
† 3. 8. 1935 Chrósćicy / Crostwitz

Farar, kulturny historikar, basnik, předsyda Domowiny.

Tachantska šula a Katolski wučerski seminar w Budyšinje, 1882–92 chowanc Serbskeho seminara w Praze, tam 1882–89 němski Małostronski gymnazij a 1889–92 studij teologije; 1893–95 kapłan w Budyšinje, Lubiju a Worklecach, 1896-1908 tachantski prědar w Budyšinje, 1908–22 farar w Kamjenicy a 1922–33 w Chrósćicach, 1933 na wuměnk; bratr Jurja Šewčika a M. Šewčika.
Š. bě 1889–92 starši towarstwa Serbowki a je z lyriku a prozu přinošował do Kwětkow. Wot 1896 redigowaše za Katolski Posoł politiski rozhlad. 1906-08 bě redaktor tutoho časopisa a zdobom prěni muzejownik Maćicy Serbskeje w Serbskim domje w Budyšinje. Stwori nahladnu ličbu lyriskich a lyrisko-episkich basnjow, wosebje patriotiskeho charaktera. 1899 wuda třeći zešiwk Jubilejnych spisow Serbowki pod titulom „Baje a basnički“. Z kulturno-historiskich spisow ma so mjenować „Prěnički křesćanstwa mjez Serbami“ (Časopis Maćicy Serbskeje 1902). W tutym času wuda tež rjad nabožinskich spisow.
Š. bě 1927–30 předsyda Domowiny a wot 1890 čłon Maćicy Serbskeje.

DALŠE WOZJ.: „Wostajmy, štož škodźi, čińmy, štož so hodźi“ – Łužica 7 (1889), str. 14-15, 20-21; „Naša politika“ – Katolski Posoł 42 (1904), str. 21 a dr.; „Won do swěta“ – Katolski Posoł 69 (1931), str. 235 a dr.

ŽÓ./LIT.: O. Wićaz, Nekrolog – Łužica 48 (1935). str. 30-31; J. Wjenka, Nekrolog – Časopis Maćicy Serbskeje 89 (1936), str. 4-15

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984