Sorabistiska wučba na BTU Choćebuz-Zły Komorow: Europske mjeńšiny a serbska kultura a rěč

Mjezydisciplinarne zarjadowanje spěchuje towaršnostny dialog wo mjeńšinach w Europje

Serbski institut poskići w lěćnym semestrje 2025 na BTU Choćebuz-Zły Komorow wučbne zarjadowanje z titulom “Europske mjeńšiny a serbska kultura a rěč”. We wuskim zhromadnym dźěle z fachowymaj wobłukomaj regionalne planowanje a kubłanske wědomosće ma so z tym trajny wučbny poskitk etablěrować, kotryž so z mnohotnosću europskich mjeńšinow a we wosebitej měrje ze serbskej kulturu a rěču rozestaja.

Zaměr je, wědomje za mjeńšinowe prawa, kulturelnu mnohotnosć a rěčnu identitu zesylnjeć a studowacym funděrowane dohlady do žiwjenskich swětow, wužadanjow a wuwićowych perspektiwow awtochtonych mjeńšin zmóžnjeć. Wosebity fokus leži při tym na serbskim wobydlerstwje, na jich stawiznach, rěči a kulturje w konteksće regionalnych wuwićowych procesow.

Mjezydisciplinarne zarjadowanje za studowacych wšěch fachowych směrow (4 semesterske tydźenske hodźiny) zahaji so 24. jutrownika ze 27 studentami. Sobudźěłaćerjo wotrjada za regionalne wuwiće a mjeńšinowy škit Serbskeho instituta su zarjadowanje koncipowali a přewjedu wučbne zarjadowanja: dr. Jenny Hagemannowa, dr. Anastasija Kostiuçenko-Kessler, dr. Lutz Laschewski a Měto Nowak. Cyłk sobuskutkowacych wudospołni nimo toho Renata Shamsutdinova z fachoweho wobłuka kubłanske wědomosće BTU.

“Z tym přinošujemy widźomnosći a hódnoćenju serbskeje kultury a rěče a dawamy impulsy za tolerancu a mnohotnosć Europy” wujasni dr. Jenny Hagemannowa za cyłk docentow.

Sorabistiska wučba na TU Drježdźany a w Lipsku

Nimo noweho poskitka na BTU Choćebuz-Zły Komorow poskići TU Drježdźany w lěćnym semestrje 2025 sćěhowacej wučbnej zarjadowani:

• prof. dr. Hauke Bartels: seminar slawistika/Digital Humanities “Digital Humanities w slawistice. Wubrane dźěłowe pola na přikładźe sorabistiki”
  – dr. Robert Lorenc: seminar slawistika/stawizny/germanistika “Brunica a Brusnica. Brunica we Łužicy z perspektiwy němsko-serbskich diskursnych stawiznow.”

Sorabistiski curriculum při TU Drježdźany wuwi so we wot VolkswagenStiftung spěchowanym projekće “Integrated Digital Sorbian Studies” (IDSS), kotryž zmóžni wot lěta 2022 intensiwne zhromadne dźěło mjez Serbskim institutom w Budyšinje a Choćebuzu na jednym boku, a Institutomaj za slawistiku a germanistiku na Drježdźanskej TU na druhim boku.

Wot lěćneho semestra 2024 wuwučuje nimo toho stawiznarka Serbskeho instituta dr. Lubina Malinkowa na Instituće za sorabistiku Lipšćanskeje uniwersity studentow w sorabistiskej stawiznowědźe.