24. oktobra: Knižne předstajenje składnostnje Dnja bibliotekow “Die Oberlausitz im Zweiten Weltkrieg”

termin: 24.10.2025 18:00 hodź.

Městno zarjadowanja: Barokny dom Zhorjelc (Barockhaus Görlitz), žurla Johannesa Wüstena Nysowa droha 30, Zhorjelc

Michael Richter „Die Oberlausitz im Zweiten Weltkrieg. Studie zu den wendisch-deutschen Kreisen in Sachsen und Niederschlesien 1936–1946“
Spisy Serbskeho instituta 68

Z lektorom Ludoweho nakładnistwa Domowina Michałom Nukom a dr. Thomasom Wideru (Hannah-Arendtowy-Institut Drježdźany) za Serbski institut 

W swojim dwuzwjazkowym wudaću “Die Oberlausitz im Zweiten Weltkrieg” zabjerje Michael Richter zdobom regionalnu kaž tež serbsku perspektiwu k tehdyšim wobstejnosćam a podawkam w Hornjej Łužicy. Na šerokej bazy dotal hišće njewobkedźbowanych žórłow wopisuje nadrobnje struktury nacionalsocialistiskeho teroroweho aparata w Hornjej Łužicy a pomjenuje tudyšich zamołwitych a podpěrarjow runje tak kaž přećiwnikow režima a wopory.

Wosebitu kedźbnosć kładźe na čłowjekow a jich biografije a dopomnjenki. Z wulkej ličbu jednotliwych přikładow z wokrjesow Budyšin, Kamjenc, Lubij, Wojerecy, Rózbork a zdźěla Zhorjelc wobjednawaja so tehdyše wuwića: wot regionalnych strukturow a rozsudźacych wosobinow w NSDAP přez poměr Serbow ke knježerstwu, wobchad ze Židami, nućenymi dźěłaćerjemi a wójnskimi jatymi, přez wójnske hospodarstwo a wuwiće wójny, předewšěm w nalěću 1945, hač k wobsadźenju Hornjeje Łužicy přez Čerwjenu armeju, wójnskim sćěham a zarjadniskemu a politiskemu nowozapočatkej po němskej kapitulaciji.

Knižne předstajenje je zhromadne zarjadowanje Hornjołužiskeje biblioteki wědomosćow, Ludoweho nakładnistwa Domowina a Serbskeho instituta