Dźěłarnička w Bochumje: “Mjez herbstwom a přichodom”

Mjez herbstwom a přichodom: Metody přirunowaceho slědźenja wo heritage- language

To je titul workshopa 10. a 11. julija 2025 na Poruhrskej uniwersiće w Bochumje, na kotryž je team DFG-projekta „Heritage Languages w přirunanju: Hornjoserbšćina a pólšćina w Němskej (HOsPoD)“ přeprosył. Projektowa skupina přepytuje, kak wuskutkuja so rozdźělne ramikowe wuměnjenja na zdźerženje rěče a wuwiće gramatiskich kategorijow w heritage languages. Jako heritage languages pomjenuja so rěče, kotrež njejsu w towaršnosći dominowaca rěč – kaž tu awtochtona mjeńšinowa rěč hornjoserbšćina a alochtona (přez migraciju zasydlena) mjeńšinowa rěč pólšćina w Němskej – a so wot dźěći na přirodne wašnje (w swójbje) paralelnje k dominantnej rěči přiswoja.

Na workshopje su so wjacori rěčespytnicy Serbskeho instituta wobdźělili: prof. dr. Hauke Bartels, doktorandka Lydija Matikec, prof. dr. Thomas Menzel, dr. Leńka Šołćic a dr. Jana Šołćina.

Předstajichu so slědźerske prašenja a prěnje slědźerske wuslědki projekta. Nimo tutych přinoškow a dobreje fachoweje wuměny, wobsahowaše dźěłarnička zajimawe přednoški kooperaciskich partnerow projekta a dalšich hosći k wšelakorym temam kołowokoło heritage languages resp. mjeńšinowych rěčow (zastupjene běchu nimo Serbskeho instituta, Poruhrska uniwersita Bochum, uniwersita Konstanz, uniwersita Adama Mickiewicza Poznań (PL), uniwersita Szczecin (PL), Pólska akademija wědomosćow Waršawa (PL) a uniwersita Bern (CH)).

Přednoški wobdźělnikow Serbskeho instituta:

• Projekt HOsPoD – Typy heritage languages w přirunanju (Tanja Anstatt / Leńka Šołćic)
• Metody w projekće HOsPoD za přepytowanje rěčnostrukturelnych změnow: Animatnosć (Lydija Matikec)
• Rěčne daty k slědźenju w mjeńšinowych rěčach: Naprawy ke kompensaciji přiběraceho njedostatka na přikładźe delnjoserbšćiny (Hauke Bartels)
• Zwisk mjez rěčnej biografiju a rěčnym stawom pola šulerkow a šulerjow na serbskich šulach (Jana Šołćina)
• Přeměnjenje rěče rozkłasć abo „jenož“ wopisować. K potencialej fleksiskeje morfologije serbšćiny za slědźenja w diachronej linguistice (Thomas Menzel)

Rozprawa: Lydija Matikec, Leńka Šołćic