Open Access: Mały rjad a sorabistiske dźěłowe papjery

Wot nětka wozjewja Serbski institut swój „Mały rjad“ kaž tež “Sorabistiske dźěłowe papjery” přez nowy publikaciski server Qucosa. Tuchwilu je na Qucosa poslednje dwanaće wudaćow Małeho rjadu, wšitke dźewjeć Sorabistiske dźěłowe papjery kaž tež jednotliwe dalše přinoški pod open-access-wuměnjenjemi (ze swójskej DOI) a za kóždehožkuli přistupne. Docpějeće wozjewjenski kanal přez homepage Serbskeho instituta abo direktnje pod https://si.qucosa.de/recherche/ (pokiw: jeli zapodaće hwěžku do tamnišeho pytanskeho pola, so wam wšitke wozjewjenja pokazuja).

Mały rjad

Mały rjad wuchadźa w swójskim nakładnistwje Serbskeho instituta. Spektrum wobsahuje wědomostne studije z wobłuka serbskeje rěče, kultury a mjeńšinoweje politiki. Zhotowjenje zešiwkow w swójskej režiji při redakcionelnym a ćišćerskim přihotowanju garantuje wysoku fleksibilitu a zmóžnja tež wudawanje dokumentow, zakónčacych dźěłow, konferencnych zwjazkow, posudkow atd. w krótkim času. Prěnje dźesać zwjazkow je pod wuměnjenjemi open-access za kóždeho wužiwarja přistupne, jednotliwe wudaća staršich zešiwkow móžeće sej zadarmo na homepage Serbskeho instituta downloadować. Dalše zwjazki wozjewjamy krok po kroku w nowym publikacisikim kanalu. Ćišćane eksemplary móžeće nadal pod si@serbski-institut.de abo telefonisce w sekretariaće Serbskeho instituta skazać, tel. 03591 4972-0.

Sorabistiske dźěłowe papjery

W rjedźe Sorabistiske dźěłowe papjery wuchadźeja w njekrutych wotstawkach dźěła a rozprawy, zwjetša z projektow Serbskeho instituta. Su to poziciske a konceptowe spisy, dokumentacije (na př. Best Practices) a podobne teksty z aktualneho dźěłoweho procesa instituta. Pod titulom Rěčne rumy jako dimensije wužiwanja rěče. Naćisk teoretiskeho koncepta k analyzy delnjoserbskich rěčnych rumow wuńdźe njedawno dźewjaty zešiwk tutoho rjadu.

Wo Qucosa

Qucosa je poskitk wědomostnych bibliotekow w Swobodnym staće Sakskej, zwoprawdźeny přez Saksku krajnu biblioteku – Statna a Uniwersitna biblioteka Drježdźany (SLUB Drježdźany). Hladanje servera přewozmje wotpowědny wužiwar, w tutym padźe Serbski institut.

Nowy publikaciski a je wuslědk mjezynarodneho open-access-hibanja, kotrež so za swobodny přistup k wědomostnym wuslědkam zasadźuje. Server za publikacije a dokumenty skići awtoram po cyłym swěće přistup k dospołnym tekstam a dołhodobne archiwowanje publikacijow. Elektroniske dokumenty so z strukturěrowanymi metadatami bibliografisce wopisuja. Z pomocu nacionalnych a mjezynarodnych bibliotekowych katalogow, pytanskich mašinow a druhich instrumentow so tute dokumenty zapisuja. Nadeńdźemy je mjez druhim w katalogu SLUB (SLUB-Katalog), w Zwjazku južnoněmskich bibliotekow (Südwestdeutscher Bibliotheksverbund), w katalogu Němskeje narodneje biblioteki (Katalog der Deutschen Nationalbibliothek), pola Google Scholar abo pola BASE (Bielefeld Academic Search Engine).