Mjezynarodna konferenca wěnuje so wužadanjam mjeńšinow w strukturnych změnach
W Lipsku wotměje so wot wčerawšeho (13./14. nowembra) mjezynarodna konferenca MINREG 2025 z jendźelskim titulom „Difference and Belonging: Indigenous and Autochthonous National Minorities in Europe’s Transforming Regions “ (Diferenca a přisłušnosć: indigene a awtochtone narodne mjeńšiny w europskich kónčinach w změnach) z něhdźe 30 wobdźělnikami. Schadźowanje wuhotujetej Leibnizowy institut za krajowědu (IfL) a Braniborska Techniska uniwersita Choćebuz – Zły Komorow w kooperaciji ze Serbskim institutom (SI).
Na konferency zaběraja so wobdźělnicy z mnohotnymi teoretiskimi a empiriskimi perspektiwami na indigene a awtochtone narodne mjeńšiny srjedź europskich transformaciskich procesow. Łužica słuži jako centralny přikład za mjeńšinowy region, kotryž dožiwja přez kónc zmilinjenja wuhla, z tym zwjazowacej změnu strukturow, kaž tež digitalnu a ekologisku změnu, hłuboko sahace towaršnostne přeměnjenje.
Schadźowanje tematizuje kulturelne a politiske konflikty a přepytuje rólu planowanja a regionalneho wuwića w tutych procesach. Sobuorganizator dr. Fabian Jacobs wot Serbskeho instituta pokazuje na wosebite wužadanja: „Hladamy najprjedy na Serbow jako domoródnu mjeńšinu. Tajke wulke přewróty potrjechja hospodarstwo, towaršnosć a kulturu w samsnym času. Mjeńšiny su potom z wosebitymi problemami konfrontowane.”
Wjacore přednoški złoža fokus na serbsku mjeńšinu a na wužadanja w strukturnej změnje: dr. Kito Kśižank (SI) a prof. Francis Harvey (IfL Lipsk) tematizujetaj ćeže při zwěsćowanju serbskich městnostnych mjenow w digitalnych zapiskach. Měto Nowak (SI) přepytuje w swojim přednošku na přikładźe Łužicy (nje-)integraciju narodneje mjeńšiny do regionalneje změny. Dr. Lutz Laschewski (SI) zaběra so z napřećiwkom mjez škitom mjeńšinow a regionalnym hospodarskim wuwićom. Nimo toho přepytuje dr. Kristian Naglo (SI) na přikładźe europskeho koparskeho mišterstwa narodnych mjeńšin Europeada temu identity a přisłušnosće w sporće.
Přirunujo měrja so přinoški na druhe europske mjeńšinowe regiony, kotrež přeńdu podobne změny strukturow. Fabian Jacobs wuzběhnje: „Mamy wuměnu mjez mjeńšinami za njeparujomnu. Wona pokazuje, zo su tež problemy přirunajomne a zo eksistuja hižo ideje a rozrisanja, z kotrychž mjez sobu profitować zamóžemy.”
Dalši zaměr konferency je intensiwěrowanje wuměny mjez kulturnowědomostnym a geografiskim slědźenjom. Z tym ma so zhromadne dźěło na temach strukturneje změny we Łužicy, wosebje na polu regionalneho wuwića a planowanja, posylnjeć.
- wjace informacijow namakaće na zarjadowanskej stronce (z programom jako download)
