26. februara: Premjera nowedeje edicije z jewišćowej hudźbu Juro Mětška (knižka z dwójnej CDju)

termin: 26.02.2026 18:00 hodź.

Městno zarjadowanja: Smolerjec kniharnja, Sukelnska 27, 02625 Budyšin

Edicija z jewišćowej hudźbu serbskeho komponista Juro Mětška (1954-2022) je krótko do hód wušła a wopřijima CDjce, bohaće ilustrowanu knižku, film a dalši material. Jewišćowa hudźba je wažny mozaikowy kamušk w mnohostronskim wuměłskim tworjenju komponista. Edicija prezentuje kompozicije k dramje “Die wendische Schiffahrt” Kita Lorenca a klankohrě “Čertowy móst” Mileny Markoveje. Nimo hudźby su so z rěčnicu tež teksty nahrawali, kotrež sceniske jednanje zjimaja. Tak móže připosłuchar spěwy a hudźbne sekwency lěpje přirjadować a cyłkownu twórbu zrozumić. Wobrazy Ulriki Mětškoweje, fachowy tekst Geralda Felbera a dalše informacije wo awtorach a sobuskutkowacych wuměłcach knižku wudospołnjeja. Film dokumentuje jako přidatny material (přez QR-code) nahrawanja hudźby nazymu 2024 w Berlinje.

Na premjerje wočakuja publikum dohlady do mnohostronskeho materiala kaž tež wurězki z filmoweje dokumentacije.

• hlej tež zdźělenka wot 19.12.2025