Do wutroby spěwane – Nowe wudaće w Małym rjedźe Serbskeho instituta wušło

W Małym rjedźe Serbskeho instituta je wušła kniha Marleen Schindler pod titulom „Ins Herz gesungen. Herrnhutische Wundenmystik in deutschen und sorbischen Liedern der 1740er Jahre“ [serbsce: Do wutroby spěwane. Ochranowska mystika ranow w němskich a serbskich spěwach 1740tych lět]. Nimo ćišćaneho wudaća předleži kniha digitalnje swobodnje přistupna we formje open access. Studija je nastała w lěće 2023 jako masterske dźěło na Drježdźanskej TU w předmjeće germanistiki. W lěće 2024 spožči so awtorce za nje myto Arnošta Muki Maćicy Serbskeje. Marleen Schindler je z lěta 2023 wědomostna sobudźěłaćerka a wot lońšeho doktorandka Serbskeho instituta w Budyšinje.

W srjedźišću studije steja spěwy bratrowskeje jednoty z 18. lětstotka ze swojej charakteristiskej emocionalno-wobrazliwej rěču. Tuta bě za mnohich wěriwych wosebje powabna, wona přinošowaše bytostnje k rozmachej jednoty a přisporješe wutworjenje wosebiteje Ochranowskeje identity. Awtorka pokaza na přikładach spěwow a zapiskow w słownikach, zo njewobwliwowaše jednota ze swojej wosebitej rěču jenož wuwiće němčiny, ale tež serbšćiny.

Ze swojim dźěłom nawjaza awtorka na dołholětne slědźenja Serbskeho instituta k pietizmej a bratrowskej jednoće. W poslednich lětach je wosebje dr. Lubina Malinkowa na šěroki kulturnostawizniski wuznam jednoty za Serbow pokazała Najnowša publikacija Małeho rjadu wobohaća wědomostne dopóznaća nětko wo rěčespytnu perspektiwu.

Wo awtorce:

Marleen Schindler studowaše rěčespyt, literarne a kulturne wědomosće kaž tež europske rěče na Drježdźanskej TU. Za studijny čas a jako wědomostna pomocnica na TUD zaběraše so z nabožnej rěču w historiskich Ochranowskich tekstach. Tuchwilu dźěła jako doktorandka Serbskeho instituta na swojim promociskim předewzaću „Studien zur Semiotisierung des sorbischen Ostereis“. Nimo toho zaběra so we wobłuku digitalizaciskeho centra Serbskeho instituta z digitalizaciju kulturnych objektow.

• wo Małym rjedźe