Wustajeńca „Wěru a pismo šěrić – Henriette Catharina von Gersdorf (1648-1726)“

termin: 07.03.2026 - 31.03.2027

Městno zarjadowanja: Serbski institut Budyšin, Dwórnišćowa 6, 02625 Budyšin

Kabinetna wustajeńca we foyeru před čitarnju prezentuje dwurěčnje (serbsce, němsce) žiwjenje zemjanki Henriette Catharina von Gersdorf (1648-1726) z daloko sahacymi slědami hač do přitomnosće.

Wopisanje

Pobožna basnica a wulkomyslna darićelka Henriette Catharina von Gersdorf, mać 13 dźěći, zawostaji hłuboke slědy w serbskich kulturnych stawiznach. Ze swojej iniciatiwu, ćišć wot Michała Frencla přełoženych bibliskich knihow zapłaćić, steji wysoko kubłana zemjanka na započatku serbskeho pismowstwa. Jeje angažement bě druhim zemjanam přikład, so tohorunja za Serbow zasadźować. Tak wjedźeše jeje wnučk Nikolaus Ludwig von Zinzendorf, załožićel Ochranowa, swoje dźěło bjezposrědnje na jeje skutkowanje wróćo. Wosebje pak móhł hrabja Friedrich Caspar von Gersdorf jako jeje naslědnik ličić, wón podpěraše šćedriwje ćišć serbskich knihow a nastorči wšelake kubłanske iniciatiwy na dobro Serbow.

Wustajeńca sposrědkuje wědu wo spočatkach hornjoserbskeho přełožka biblije a serbskeho ćišća biblije kaž tež wo spěchowanskich projektach Henrietty Cathariny von Gersdorf. Wotewrěła je kabinetna wustajeńca składnostnje Dnja archiwow 2026.

Wotewrjenske časy

wot póndźele do srjedy: 9:00 – 16:00 hodź.
štwórtk: 9:00 – 18:00 hodź.