Wupisanje dźěłoweho městna: bibliotekar (m/ž/d)
Serbski institut ze sydłom w Budyšinje a wotnožkomaj w Choćebuzu přepytuje rěč, stawizny a kulturu Serbow w Hornjej a Delnjej Łužicy w zašłosći a přitomnosći. Serbskemu institutej přisłušatej Serbska centralna biblioteka a Serbski kulturny archiw jako jeničkej zjawnej fachowej zběrce za serbske a sorabistiske bibliotekowe a archiwne materialije.
Serbska centralna biblioteka pyta tak spěšnje kaž móžno angažowanu bibliotekarku / angažowaneho bibliotekara.
Jedna so wo najprjedy na dwě lěće wobmjezowane dźěłowe městno z dźělnočasowym wobjimom hač do 28 hodźin. Wo zběhnjenje časoweho wobmjezowanja so prócujemy. Su-li wosobinske wuměnjenja date, płaći so mzda po mzdowej skupinje 9 TV-L.
Waše nadawki
- słužba w čitarni: poradźowanje, rešerša, wupožčowanje, wobdźěłanje dalokoskazankow rozšěrjenje a hladanje wobstatka: wobdźěłanje nowinow a časopisow, wuměna publikacijow, katalogizowanje a techniske wobdźěłanje medijow
- bibliografiske zapisowanje: systematiske přehladanje časopisow a nowinow (tež cuzorěčnych) za bibliografiske wuhódnoćenje
- podpěra při wjedźenjach a zjawnostnym dźěle
- digitalizacija a digitalne wobdźěłanje wobstatka
Waš profil
- wotzamknjene wukubłanje jako fachowy přistajeny / fachowa přistajena za medijowe a informaciske słužby – fachowy směr biblioteka (FaMI biblioteka) resp. přirunujomne powołanske znajomosće
- pisomne a ertne wobknježenje hornjo- abo delnjoserbšćiny a němčiny
- dobre cuzorěčne znajomosće su wužitne (jendźelšćina, dalša słowjanska rěč)
- wěsty wobchad z programami we wobłuku MS Office a znajomnosće we wobchadźe z bibliotekskimi systemami, kaž tež systemow bibliotekskeho zwjazka K10Plus (WinIBW)
- zwólniwosć so do nowych nadawkow a nowych IT-toolow zadźěłać a so dale kubłać
- komunikaciska kompetenca
- zajim za serbske literarne a kulturne wuwiće
Poskićimy jobowy tiket jako potuńšenu jězdźenku (Deutschlandticket). Wočakuje Was mnohostronske a wotměnjawe dźěło w motiwowanym a interdisciplinarnym teamje. Eksistuja móžnosće dalekwalifikacije.
Sćelće Waše požadanje ze zwučenymi podłožkami hač do 16.10.2026 bjezwuwzaćnje w digitalnej formje (PDF) na direktorat Serbskeho instituta z adresu si@serbski-institut.de. Wobkedźbujemy tež požadanja, kotrež pozdźišo dóńdu, njeje-li dźěłowe městno hižo wobsadźene. Kóšty w zwisku z požadanskim procesom njemóžemy Wam wurunać.
Serbski institut spěchuje powołanske runostajenje wšěch splahow a podpěruje wurunany poměr mjez powołanjom a swójbu. Tohodla namołwjamy wosebje žony so požadać. Při samsnej kwalifikaciji dźiwamy we wosebitej měrje na ćežkozbrašenych požadarjow.
Maće-li prašenja, wobroćće so prošu rady na Wita Bejmaka, nawodu wotrjada „Serbska centralna biblioteka/Serbski kulturny archiw“ pod wito.bejmak@serbski-institut.de.
Wjeselimy so na Waše požadanje!
Pokiw datoweho škita: Ze zapodaćom wašeho požadanja přihłosujeće předźěłanju Wašich na wosobu so poćahowacych datow w ramiku a k přewjedźenju požadanskeho procesa. Tute přizwolenje móžeće kóždyžkuli čas bjez mjenowanja přičin pisomnje abo elektronisce napřećo direktoratej cofnyć. Prošu wobkedźbujće zo tajke cofnjenje přizwolenja k tomu wjedźe, zo njemóžemy Waše požadanje w tutym procesu wjace wobkedźbować.