Turistifikacija multietniskich rumow. Awtochtone mjeńšiny jako aktery a objekty cuzbniskeho wobchada w 19. a 20. lětstotku (dźěłowy titul)

Slědźerski projekt přepytuje turistifikaciju (historisce) wjacerěčnych, multietniskich rumow w 19. a 20. lětstotku a wěnuje so prašenjam transnacionalnych stawiznow splećenosće moderneho turizma, wosebje hladajo na rólu narodnych mjeńšinow a njedominowacych etniskich skupinow w tutych procesach. W fokusu přirunowaceho přepytowanja stejitej Łužica, wosebje Błóta z tam bydlacymi Serbami, kaž tež sewjerofriziska pobrjóžna a kupowa kónčina z tamnymi domoródnymi Sewjernymi Frizami. W projekće so štyri temowe kompleksy dokładnišo přepytuja: turistiske infrastruktury, akterojo a praktiki etniskeho turizma, konstrukcije a recepcije „cuzeho“, diskursy wo turizmje.
Přirunanje dowoloweju regionow pokazuje zhromadnosće a rozdźěle turistiskeho spřistupnjenja multietniskich rumow, interakcije mjez etniskimi mjeńšinami, zastupjerjemi wjetšinoweho wobydlerstwa a turistami kaž tež praktiki inkluzije, ekskluzije a přiswojenja. Přepytowanje poměrnje dołheje doby dowoli diachrone wopisanje zažneho etniskeho turizma a jeho socialnych, kulturelnych a hospodarskich transformacijow, wosebje hladajo na politiske změny a łamki 19. a 20. lětstotka.