Zakładne slědźenje k stawiznam wosobow

Biografiske slědźenja k jednotliwym wosobam a skupinam wosobow su implicitnje kaž tež eksplicitnje dźěl mnohich projektow w Serbskim instituće. Husto wukristalizuja so biografiske informacije we wobłuku druhich slědźerskich projektow takrjec jako „pódlanski produkt“.
Wot lěta 2007 steja „Biografije k serbskej ludowědźe“ na internetnej stronje Serbskeho instituta k dispoziciji. Dźěło na tutej datowej bance započa so w lěće 2004. Nimo toho zestajeja sobudźěłaćerki a sobudźěłaćerjo Serbskeho instituta hižo wjele lět přinoški za online-leksikon „Sakska biografija“ ISGV Drježdźany.
Zaměr projekta je, wšelake biografiske slědźenja a resursy při Serbskim instituće koordinować a do nadrjadowaneje struktury zwjesć. Za to měł so srjedźodobnje digitalny archiw za biografiske informacije natwarić, w kotrymž so biografiske daty centralnje składuja a wobdźěłuja.
Jako wotewrjena platforma měł tutón repozitorij na jednej stronje falowace nowowudaće „Noweho biografiskeho słownika“ z lěta 1984 narunać. Na druhej stronje wolóži projekt wudospołnjenje Zhromadneje normoweje dataje (GND) Němskeje narodneje biblioteki.