Weihnachts- und Neujahrsgruß des Sorbischen Instituts im Jahr 2025. Mit Ostereier-Verziertechnik verzierte Weihnachtsbaumkugeln vor hellblauem Hintergrund; in einer Kugel versteckt sich das Institutslogo; Schriftzug übersetzt:

12.12.2025

Datowa safari w Sakskej: “DIKUSA” prezentuje digitalne pokłady

Zhromadna zdźělenka Sakskeje akademije wědomosćow a projektnych partnerow, 12. december 2025:

Zakónčaca konferenca slědźenskeho projekta “Zwjazanje digitalnych kulturnych datow w Sakskej”

15. a 16. decembra 2025 wotměje so w Sakskej akademiji wědomosćow (SAW) w Lipsku zakónčaca konferenca projekta DIKUSA „Zwjazanje digitalnych kulturnych datow w Sakskej“. Na njej prezentuja so digitalnje zwjazane slědźenske wuslědki wo kulturnych datach w Sakskej kaž tež krótkofilmy k wšitkim dźělnym projektam. Zarjadowanje wotewritaj prof. dr. Heike Graßmann, statna sekretarka w Sakskim statnym ministerstwje za wědomosć, kulturu a turizm, a prezident akademije prof. dr. Hans-Joachim Knölker.

Z projektom DIKUSA je so wot 2022 do 2025 wuwiće techniskeje infrastruktury za duchownowědomostne slědźenje w Sakskej doprědka ćěriło, a to z pomocu krajnych srědkow Sakskeho statneho ministerstwa za wědomosć, kulturu a turizm (SMWK) we wysokosći 1,5 milionow eurow. W srjedźišću steješe zwjazanje digitalnych kulturnych datow, zo by so zmóžniło slědźenje k mobilnosći, migraciji a transformaciji městnow, wosobow a artefaktow w časowej a rumnostnej perspektiwje.

W zhromadnym projekće wobdźěłachu zwonkauniwersitne duchownowědomostne slědźenišća w Sakskej – HAIT, GWZO, ISGV, DI, SI kaž tež SAW sama – šěsć dźělnych projektow, kotrychž wuslědki so digitalnje hromadu wjedu. Wuwiće a natwar techniskeje infrastruktury koordinowaše a podpěraše wotrjad SAW KompetenzwerkD.

“Zaměr bě, zmóžnić małobarjerne digitalne registrowanje wědy w datowych bankach, štož dotal hišće njeeksistowaše,” praji PD dr. Franziska Naether wotrjada KompetenzwerkD. Wona doda: “Nam bě wažne, so sej sobudźěłaćerjo přiswojeja w běhu projekta kompetency za digitalne dokumentowanje, zalinkowanje a digitalne wizualizowanje swójskeho slědźenja, zo bychu je pozdźišo za nowe projekty nałožować móhli.”

Konferenca skići platformu, zo bychu so na jednej stronje wuslědki a dopóznaća projekta prezentowali, na druhej stronje je hnydom na městnje wuspytali. Wona je wusměrjena wosebje na fachowcow na polu duchownych wědomosćow a digital humanities kaž tež na wšitkich zajimcow.

Programowe elementy:

přednoški: dohlady do slědźerskich wuslědkow šěsć dźělnych projektow DIKUSA-předewzaća
spřistupnjenje slědźerskich datow w nowym slědźerskim registrje a showowym woknješku kaž tež prezentacija sydom krótkofilmow
diskusija po fishbowlskim wašnju: wotewrjena diskusija k temje “Přichod stawizniskeho slědźenja w digitalnym konteksće. Naslědnosć kulturnych datow”
perspektiwy do přichoda a nowe kooperacije: Kak póńdźe dale z DIKUSA? Zhromadne nadźěłanje wizijow a móžne přichodne projekty

Wobdźělene slědźenišća / dźělne projekty:

Leibnizowy institut za stawizny a kulturu Židow “Simon Dubnow” z.t., Lipsk (DI): Möglichkeiten und Grenzen jüdischer Teilhabe an sächsischen Hochschulen: Absolvierende aus Chemnitz, Dresden, Freiberg und Mittweida (1869–1938)
Leibnizowy institut za stawizny a kulturu wuchodneje Europy z.t., Lipsk (GWZO): Migration von Künstlern nach und aus Sachsen im 17. Jahrhundert
Institut Hannah Arendt za slědźenje totalitarizma z.t. na Techniskej uniwersiće w Drježdźanach (HAIT): Aus, nach und innerhalb von Deutschland migrierte Frauen – Aufbau einer erfahrungsgeschichtlichen Wissensbasis
Institut za stawizny a ludowědu w Sakskej z.t., Drježdźany (ISGV): Ausbau des Historischen Ortsverzeichnisses zur zentralen Schnittstelle für normierte Ortsdaten in Sachsen
Sakska akademija wědomosćow w Lipsku (SAW): Landschaft als KulturErbe. Transformation einer Bergbaulandschaft in Sachsen im 20. Jahrhundert
Serbski institut z.t., Budyšin (SI): Serbske kulturne pomniki w Sakskej. Natwar wirtuelneho dźěłoweho systema za digitalne zapisanje a prezentaciju

Dalše informacije:

Krótkofilmy:

Dypkownje wot spočatka konferency su sydom krótkofilmy na youtube-kanalu SAW přistupne, hlej www.youtube.com/@saw-leipzig.

Hromadźe z filmowču Juditj Schein rěča sobudźěłaćerjo DIKUSA-projekta wo slědźerskich temach, wužadanjach, zhromadnym dźěle a pokazuja wuslědki swojeho wědomostneho dźěła. © Sakska akademija wědomosćow w Lipsku, 2025

Sakska akademija wědomosćow w Lipsku je čłon Zwjazka němskich akademijow wědomosćow. Wón koordinuje akademiski program, kotryž je jako tuchwilu najwjetši duchowno- a kulturnowědomostny dołhodobny slědźerski program Zwjazkoweje republiki Němskeje nošerstwje Zwjazka a zwjazkowych krajow. Tuta naprawa so sobu financuje z dawkowych srědkow na zakładźe wot Sakskeho krajneho sejma schwaleneho etata.