Dźěłowy plan za lěto 2021 schwaleny – Přirada jara spokojom z dźěłom instituta
Na swojim regularnym posedźenju 26. nowembra schwali kuratorij dźěłowy plan (projekty, předewzaća atd.) Serbskeho instituta za lěto 2021. Wědomostna přirada schadźowaše so hižo wot 25. nowembra a připowědźi regularnu ewaluaciju w přichodnym lěće. Nimo toho bu prof. em. Roland Marti z uniwersity w Saarbrückenje jako nowy předsyda wědomostneje přirady woleny, jeho zastupjerka je prof. Silke Göttsch-Elten z uniwersity w Kielu.
Nowej čłonce a nowy čłon we wědomostnej přiradźe su: prof. Andreas Rutz, profesor za sakske krajne stawizny na Drježdźanskej Techniskej uniwersiće a direktor Instituta za sakske stawizny a ludowědu (ISGV), prof. Regina Bendix, kulturna wědomostnica a europska etnologowka w uniwersiće w Göttingenje a prof. Annette Werberger, kotraž skutkuje jako literarna wědomostnica na Europskej uniwersiće Viadrinje w Frankobrodźe nad Wódru.
Direktor Serbskeho instituta dr. Hauke Bartels: “Lětne gremijowe posedźenja su tež přeco přiležnosć, najwažniše wuwića lěta pokazać a reflektować. Wjeselu so jara, zo dósta naše dźěło tež lětsa wulke připóznaće. Ideje a wulki engagement wšěch sobudźěłaćerkow a sobudźěłaćerjow wučinjeja institut. Smy k dobremu teamej hromadźe zrostli, a je wjeselo, tute wuwiće jako direktor sobu formować móc.”
Njewotwisna wědomostna přirada poradźuje kuratorij a předsydstwo instituta we wšěch wažnych wědomostnych a organizatoriskich naležnosćach. Přirada wudźěła namjety a doporučenja k wobdźěłanym slědźerskim wobłukam a k planowanju, wosebje k lětnemu dźěłowemu planej a k dźěłowej rozprawje předsydstwa. Za to přewjedźe so lětnje plenum a posedźenja z wotrjadami. Wědomostna přirada hódnoći dale prawidłownje w štyrilětnym rytmusu slědźerske wukony a dźěłowy plan instituta w pisomnej rozprawje. Zakład za to tworja statistiki a ewaluaciske naprašniki, nimo toho wopyta přirada k tomu tež domaj instituta w Budyšinje a Choćebuzu.
Běše to premjera wirtuelneho posedźenja gremijow. Wječorny zjawny přednošk w ramiku gremijowych posedźenjow dyrbješe institut lětsa koronapandemije dla wotprajić.