7. měrca: Show and tell | Pokaž a powědaj – Dźeń archiwow

termin: 07.03.2026 14:00 - 17:00 hodź.

Městno zarjadowanja: Serbski institut Budyšin, Dwórnišćowa 6, 02625 Budyšin

My pokazamy naše drohoćinki a wy pokazaće waše

Serbski kulturny archiw a Serbska centralna biblioteka při Serbskim instituće wobdźělitej so znowa na Dnju archiwow w Němskej. Lětsa prezentuje so archiw jako městno komunikacije a dopóznaća. Nic jenož naše pokłady maja w srjedźišću stać. Přeprošamy našich wopytowarjow, dokumenty ze swójbnych stawiznow sobu přinjesć a předstajić: historiske wupokazy, wopisma, listy, serbske knihi, dźeniki, wěnowanja, fotografije, wuswědčenja atd. Snano móžeće zajimawu stawiznu k tomu powědać, snano móžemy my něšto wo pozadkach rjec abo pomhamy pismo wučitać a dale slědźić – na kóždy pad budźemy so rozmołwjeć.

Program:

• 14:00 hodź.: Wotewrjenje kabinetneje wustajeńcy “Wěru a pismo šěrić – Henriette Catharina von Gersdorf (1648-1726)”
• 14:30 hodź.: Drohoćinki serbskeho pismowstwa – wjedźenje přez archiw a biblioteku
• 15:30 Pokaž a powědaj: Zhromadnje wobhladamy sej dokumenty, fota a dalše zajimawostki z wašeho swójbneho wobsydstwa, runje tak podamy dohlad do wobstatkow Serbskeho kulturneho archiwa a biblioteki a přińdźemy do rozmołwy. Samozrozumliwje su tež zajimcy bjez dokumenta witani. – Wjeselimy so, jeli Wam móžno, nam hižo w předpolu krótku informaciju dać, telefonisce (03591 4972-32 resp. -33), přez e-mail (anna.mirtschin@serbski-institut.de resp. annett.bresan@serbski-institut.de) abo wopytajće nas w čitarni.

Poskićimy wyše toho antikwariske knihi, originalne serbske nowiny z 1950-1960tych lět kaž tež kofej a tykanc.