Imaterielne kulturne herbstwo trjeba zetkawanja – Wuměna UNESCO w Choćebuzu z nowymi impulsami

W Choćebuzu wotměwaše so 2. julija w Informaciskim, komunikaciskim a medijowym centrumje BTU Choćebuz-Zły Komorow dźěłarnička k imaterielnym kulturnym herbstwje w Sakskej a Braniborskej. Dźěłarnička Němskeje UNESCO-komisije bu w kooperaciji z Ministerstwom za wědomosć, slědźenje a kulturu Braniborskeje, z BTU Choćebuz-Zły Komorow, ze Serbskim institutom, ze Slědźerskim a poradźowanskim městnom za imaterielne kulturne herbstwo při Instituće za sakske stawizny a ludowědu, projektom „Herbstwo Łužicy“ (UNESCO 5) a Błótowskim towarstwom organizowana.

Dźěłarnička skićeše praktisku pomoc za zajimcow, kotřiž chcedźa so wo zapis do Cyłozwjazkoweho zapiska imaterielneho kulturneho herbstwa powabić. Zdobom běchu hižo zapisane iniciatiwy zastupjene. K tomu słuša tež Domowina. Jej bě so 2014 z podpěru Serbskeho instituta z Towaršnostnymi nałožkami a swjedźenjemi Łužiskich Serbow zapisk poradźił. Wot toho časa dźěła SI wusko z Domowinu hromadźe, mjez druhim w projekće „Praktiki imaterielneho kulturneho herbstwa w Delnjej Łužicy“. Wšitke projekty so na zetkanju mjez sobu předstajichu a wo swójskich nazhonjenjach rozprawjachu, štož na- a wutwar dalšich syćow mjez akterami zesylni.

Wobšěrnišu rozprawu napisa Susann Troppa („Herbstwo Łužicy“, UNESCO 5) w mjenje organizatorow. Prošu klikńće na němsku wersiju tutoho přinoška (horjeka naprawo).