BTU a SI wobzamknjetej kooperaciju
Zhromadna nowinska zdźělenka BTU Choćebuz – Zły Komorow a Serbskeho instituta
Prezidentka Braniborskeje Techniskeje uniwersity Choćebuz – Zły Komorow (BTU) Gesine Grande a direktor Serbskeho instituta (SI) Hauke Bartels podpisaštaj kooperaciske dojednanje.
Póndźelu, 26. wulkeho róžka 2026 podpisaštej BTU a SI kooperaciske zrěčenje, zo byštej zhromadne dźěło w studiju a slědźenju kaž tež w angažemenće za region nadal skrućiłoj. Partnerskej instituciji chcetej zhromadne projekty k serbskej kulturje a rěči (sorabistika) skutkownje wuwiwać a posylnjeć. Při tym natwaritej na dołholětne nazhonjenja.
Prof. Gesine Grande, prezidentka BTU Choćebuz – Zły Komorow, k tomu: „Dźensa wobzamknjene kooperaciske dojednanje naše zhromadne dźěło na nowu, institucionalizowanu runinu pozběhnje. Tak wutworimy zawjazowacy ramik za zhromadnu wučbu a zhromadne slědźenje, za zastaranje zakónčacych dźěłow a promocijow, za nowe slědźerske ćežišća a, nic naposledk, za sylnišu widźomnosć serbskeje rěče a kultury na našej uniwersiće.”
„Łužica jako stejišćo wobeju institucijow so spěšnje přeměnjuje. Z tuteje přičiny stej transformacija a kulturne herbstwo jenož dwaj přikładaj za płódne zhromadne slědźenja. Zhladowanišća su husto cyle wšelakore, je hromadźe zwjesć nam postup zmóžni – za to wutworimy nětko cyle nowy ramik”, podšmórnje direktor Serbskeho instituta prof. dr. Hauke Bartels.
Planowane su zhromadne wučbne zarjadowanja wo serbskej rěči a kulturje, staranje wo zakónčace dźěła a promocije kaž tež zhromadne slědźerske předewzaća, wosebje we wobłuku slědźenja wo mjeńšinach. Tohorunja su zhromadne zeńdźenja a konferency, prócowanje wo třeće srědki kaž tež zhromadne wužiwanje infrastrukturow, bibliotekow, digitalnych resursow a Serbskeho kulturneho archiwa dźěl tutoho zhromadneho dźěła. Při tym ma delnjoserbska rěč na campusu a w zjawnosći widźomniša być.
Wobě instituciji zamóžetej hižo na cyły rjad zhromadnych aktiwitow wróćo zhladować. Hakle w měrcu lěta 2025 stej SI a BTU transdisciplinarny forum wo digitalnej kulturje Serbow zarjadowałoj. Wyše toho wědomostnicy Serbskeho instituta na BTU wo serbskich temach přednošuja, kaž njedawno w zjawnym rjedźe čitanjow OPEN BTU.
