Mjenowy serwis w rěčnym portalu dolnoserbski.de jasnje rozšěrjeny

Mjenowy serwis w rěčnym portalu dolnoserbski.de z 50 nowymi wujasnjenjemi a 500 nowymi geografiskimi mjenami jasnje rozšěrjeny

Posłužba Delnjoserbske mjena w rěčnym portalu dolnoserbski.de skići wužiwarjam wotnětka 50 dalšich etymologiskich wujasnjenjow woznamow za wjesne mjena. Tak namakaja zajimcy na tutym portalu nětko rozjasnjowanja za cyłkownje 250 wjesnych a městnych kaž tež 50 swójbnych mjenow. Etymologiske wujasnjenja zdźěła dr. Kito Kśižank na Serbskim instituće jako dźěl wot załožby VolkswagenStiftung spěchowaneho projekta Integrated Digital Sorbian Studies. K tomu słuša tež dwutydźeński rjad wusyłanjow “Serbski mjenjowědnik wujasnijo” w serbskorěčnym programje RBB.

Wyše toho je w portalu 500 delnjoserbskich eksonymow wozjewjenych. Eksonymy su mjena a jich wotwodźenki za města, kraje, rěki, hory a dalše geografiske objekty zwonka dźensnišeho serbskeho rěčneho teritorija. Tute rozšěrjenje je dźělny projekt Digitalneho portala wo serbskich a łužiskich rěčnych a kulturnych krajinach.

Z tym móže wužiwar na dolnoserbski.de za něhdźe 2000 městnostnymi mjenami, 2500 swójbnymi mjenami a za wjace hač 100 předmjenami rešeršować. Zhromadnje z mjenowymi wariantami a wotwodźenkami (na př. pomjenowanja wjesnych wobydlerjow) wopřija datowy skład mjeztym wjace hač 20000 delnjoserbskich mjenow. K tomu přidruži so wjace hač 8500 wotpowědnikow w němskej rěči, štož dowoli tež pytanje wuchadźejo z němčiny.
Nimo toho zmóžnja posłužba přistup k datam přez interaktiwnu kartu a přez alfabetisce rjadowanu lisćinu. Tež download zběrki je móžny.

Předewzaće spěchuje Załožba za serbski lud ze srědkami Zwjazkoweho ministerstwa za nutřkowne a domiznu wotpowědujo wobzamknjenju Němskeho Zwjazkoweho sejma.