Nóc bibliotekow 2025 – impresije a mała rozprawa
Pjatk, dnja 4. apryla wobdźěli so Serbska centralna biblioteka k prěnjemu razej na cyłoněmskej Nocy bibliotekow. Wotewrjenje kabinetneje wustajeńcy wo dźěławosći nakładnistwa Lusatia tworješe zazběh do wosebiteje nocy. Wernisaži slědowachu čitanja prěki a podłu po našich wobstatkach na njewšědnych městnach. Tak čitachu so basnje, powědančka, kaž tež krimi – w běrowach, w institutnej pincy, w pawiljonje na zahrodźe, kaž tež pod třěchu. W sydarni prezentowaše towarstwo Serbska murja rjad widejow „Stawiznak“ a wirtuelne wubědźowanje „QuizSerb“. W čitarni předstajichu so móžnosće rešeršowanja w Serbskej centralnej biblioteki.
Bě to poradźena premjera, cyłkownje přiwabi Serbska centralna biblioteka něhdźe 70 zajimcow. Přichodna nóc bibliotekow wotměje so 23. apryla 2027.
Impresije prěnjeje Nocy bibliotekow w Serbskej centralnej bibliotece, 4. apryla 2025
