23. junija: Přednošk “Institucije, identita a wobdźělenje: Što posylnja kulturnu wěstotu w Bretoniskej sylni”

termin: 23.06.2026 14:00 hodź.

Městno zarjadowanja: Serbski institut Budyšin, Dwórnišćowa 6, 02625 Budyšin

Referent: prof. Jean-Rémi Carbonneau, Université de Montréal

Hladajo na tójšto njepřihódnych wobstejnosćow su rěčnicy mjeńšinowych rěčow wot 1970tych lět sem rjad strategijow rewitalizacije wuwili. Tak chcychu sylnej rěčnej změnje, kotraž we wšěch dźělach Francoskeje wot 1950tych sem knježeše, zadźěwać a dołhodobnu kulturnu wěstotu swojich rěčnych zhromadźenstwow zaručić. W přednošku přepytuje referent determinanty kulturneje wěstoty w Bretonskej, hdźež je bretonska rěč nošerka historisce skonstituowaneje teritorialneje identity ale tež wuraz regionalneho přeća k dalewobstaću.

Poćahujo so na spisy kanadiskeho sociologi Raymonda Bretona koncentruje so přednošk na hromadźeskutkowanje třoch dimensijow kulturneje wěstoty, kotrež reziliencu bretoniskeje identity a rěče dźensa wujasnjeja: institucije, kolektiwna identifikacija a participacija. Dokładnišo přepytuje referent, kak stej w konteksće sylnje centralizowaneho stata pozitiwne začuće kolektiwneje přisłušnosće a participatiwny angažement k etablěrowanju wučbneje syće resp. rěčneho planowanja wotdeleka wjedłoj.

Wo referenće

Jean-Rémi Carbonneau je profesor na Instituće za swětowu literaturu a rěče Uniwersity Montréal w Kanadźe. Wón promowowaše 2020 w politiskej wědomosći na Université du Québec à Montréal. Wot lěta 2017 hač do 2024 skutkowaše jako wědomostnik w Serbskim instituće a dźeržeše wjacore seminary na Swobodnej uniwersiće w Berlinje a na priwatnej uniwersiće Bard College Berlin na temy federalizm, nacionalizm a mjeńšiny w Kanadźe kaž tež k přirunowace politiske wědomosće. Přeslědźuje rěčnu politiku a rěčny režim, nacionalizm a konfliktne poćahi mjez rěčnymi wjetšinami a mjeńšinami kaž tež mjez rěčemi a teritorijemi. Zaběra so tež z wuměnjenjemi za wozrodźenje mjeńšinowych rěčow a rěčnu sprawnosć.