We Friziskej wo lěpšinach wjacerěčnosće přednošowała a wo praktiskich přikładach rěčneho spěchowanja we wšědnym dnju

W swojim přednošku štwórtk (7.11.) wječor předstaji rěčespytnica dr. Jana Šołćina někotre přikłady z wjacerěčneje praksy Łužiskich Serbow a rozłoži, kak móža so starši a dźěći na wjacerěčnu šulsku praksu přihotować. Při tym rozjimaše paralele serbšćiny k frizišćinje a pomjenowaše konkretne naprawy, kak móžetej so wobě mjeńšinowej rěči w šulskim wšědnym dnju etablěrować.

Podobnje našemu fachowemu dnjej 2plus za wučerjow serbšćiny přewjeduja tež pola Frizow prawidłownje dalekubłanja za wšěch akterow, kiž su na kubłanju frizišćiny wobdźěleni. We wobłuku tutoho dalekubłanja je Jana Šołćina přednošowała.
Organizator dalekubłanja je Friisk Foriining w Bredstedt, kulturny zwjazk Frizow w Sewjernej Friziskej w Schleswigsko-Holsteinskej. Na přednošk přeprosyła bě Friziska rada w Bredstedće, kiž so nad čiłym wobdźělenjom frizišćinu-wuwučowacych a studentow frizišćiny, staršich, kolegow Sewjerofriziskeho instituta, uniwersity Kiel kaž tež kubłanskeje referentki w tamnišim kultusowym ministerstwje, Karen Nehlsen, wjeseleše. Intensiwna a konstruktiwna diskusija kaž tež mnohe naprašowanja k aktualnej situaciji serbšćiny wječor skulojćichu.