Studije k semiotizowanju serbskeho jutrowneho jejka (disertacija)

Serbske jutrowne jejko je w zjawnosći jedyn z najmarkantnišich symbolow Serbow. Přiwšěm je so sorabistiske slědźenje dotal jenož zrědka z jeho wysokej kulturnej hódnotu zaběrało. Wuchadźejo z toho, zo serbske jutrowne jejko a z nim zwisowace praktiki stajnje tež wěsty woznam w sebi chowaja, přepytuja so faktory, kotrež spožčenje woznama motiwuja a charakterizuja. Zdobom maja so wobsahi a woznamy analyzować, kotrež so mjez Serbami a zwonka Serbow sposrědkuja, a kak so w běhu časa měnjeja.
Poćahujo so na ritualnoteoretiske přemyslowanja maja so tež praktiki a nałožki bliže wobkedźbować. Dale dźe wo to zwěsćić, kotři akterojo woznam serbskich jutrownych jejow wujednaja a z kotrej legitimaciju to činja. Wosebje přez institucionelne spěchowanje debjenja serbskich jutrownych jejkow – najprjedy přez Dom za serbske ludowe wuměłstwo, pozdźišo přez Spěchowanski kruh za serbsku ludowu kulturu – nastachu syće mjez ludowymi wuměłcami we Łužicy a zwonka z njeje.
Dokelž so serbske jutrowne jejko jako multimodalny nošer woznama wobhladuje, je projekt interdisciplinarnje wusměrjeny a kombinuje perspektiwy z kulturneje wědomosće, linguistiki a digital humanities. Na jednej stronje wužiwaja so daty z fotografiskeho zapisanja a digitalizacije zběrki Lotara Balka, na druhej stronje zestaji a wuhódnoći so tematiski korpus. Přidatnje wobkedźbuje so wěda ludowych wuměłcow, zo by so po móžnosći wobšěrny wobraz woznamowych dimensijow serbskeho jutrowneho jejka rysował.