Slědźerske ćežišćo “Žiwjenske wašnja we Łužicy w 21. lětstotku”

Žiwjenske wašnja etniskich mjeńšin steja w modernych towaršnosćach pod njemałym přiměrjenskim a asimilaciskim ćišćom. Fokus w slědźerskim ćežišću měri so před tutym pozadkom na dźensniše žiwjenske wašnja we wjacerěčnej Łužicy. Hospodarske, politiske a demografiske strukturne změny wjedu k elementarnemu přetworjenju wšědnych kulturnych praktikow. Tute změny njepokazuja so jenož w scenarijach pozhubjenja, ale runje tak w nowych strategijach zadomjenja a w kulturnych taktikach, z kotrymiž akterki a akterojo na změny w swojej žiwjenskej wokolinje reaguja (Trummer 2015: 140). Tuž hodźi so na mnohich městnach tež witalizacija resp. rewitalizacija mjeńšinowych kulturow spóznać.

Slědźerske ćežišćo staja tři centralne slědźerske prašenja do srjedźišća, kotrež su wšitkim přirjadowanym projektam imanentne: Kak konstituuje so dźensa wjesne serbske, bi- a wjacekulturne wšědne žiwjenje w swojej kompleksnosći? Kajke socialne mechanizmy přinošuja k (re-)witalizaciji serbskeje kultury a na kotre wašnje móža přisłušnicy mjeńšinowych kulturow sami k jeje zachowanju přinošować a jeje wuwiće wobwliwować?

rěčnik: dr. Fabian Jacobs