Pytamy listy „warnoćanskich” šulerkow a šulerjow

Serbske dźeći a młodostni, kiž w lětach 1945-1950 w Čěskosłowakskej přebywachu, pisachu prawidłownje listy k přiwuznym do Łužicy. To bě pomoc přetrać styskanje za domiznu, zdobom pak tež składnosć swójbje wo žiwjenju a wuknjenju w Čěskej rozprawjeć.

Serbski institut z.t. w Budyšinje pyta za slědźerski projekt listy a dalše dokumenty (poezijowe albumy, dźeniki, wuswědčenja, fota) ze šulskeho žiwjenja we sewjernej Čěskej.

Tute dokumenty su wažne, dokelž sposrědkuja perspektiwu dźěći a młodostnych na dobu krótko po Druhej swětowej wójnje. Z nich móže so wučitać, kotre nazhonjenja šulerjow wosebje zaběrachu.

Wuslědki z wuhódnoćenja tutych dokumentow maja so zapřijeć do knihi wo serbskich šulerkach a šulerjach we sewjernej Čěskej, kotraž ma w přichodnym času nastać.

Bychmy so wjeselili, hdyž tajke listy abo dalše dokumenty (na chwilu) Serbskemu institutej z.t., J. Piňosová, Dwórnišćowa 6 w Budyšinje přewostajiće, zo bychmy je digitalizować móhli.

Tež pokiwy, hdźe móhli so tajke listy a dokumenty nadeńć, su witane.

Kontakt: dr. Jana Piňosová