Budyšin - 28.07.2026

Serbski institut nětko w syći „Copernico – stawizny a kulturelne herbstwo we wuchodnej Europje“

Informaciska pohladnica Serbskeho instituta z titulom „Chcemy do dowola? Vamos a la playa!“ z kolažu archiwneho materiala ze Serbskeho kulturneho archiwa — Pohladnica Serbskeho instituta z titulom „Chcemy do dowola? Vamos a la playa!“ z kolažu archiwoweho materiala © Serbski institut / Marleen Schindler

Serbski institut je z nowym čłonom syće „Copernico – stawizny a kulturelne herbstwo we wuchodnej Europje“ (wot junija) a wozjewja wotnětka na online-portalu syće informacije wo swojich projektach, wustajeńcach a dalšich poskitkach. Njedawno wozjewjeny bu přinošk dr. Friedricha Pollacka wo zažnym turizmje w Błótach.

Copernico je online-portal Herderoweho instituta za historiske slědźenje wo wuchodnosrjedźnej Europje w Marburgu. 34 institucijow informuje tam nazornje a wědomostnje funděrowanje wo stawiznach a zhromadnym kulturelnym herbstwje we wuchodnej Europje. Do syće Copernico słušeja slědźenske instituty, muzeje, archiwy, biblioteki a kulturne referaty ze cyłeje Němskeje.

Nětko wuńdźe w Copernico-magacinje (online) nastawk dr. Friedricha Pollacka, stawiznarja a wotrjadnika kulturnowědomostneho wotrjada Serbskeho instituta, wo wobrazu Serbow w zažnym turizmje w Błótach. Hižo 2024 bě dr. Jana Piňosová, tohorunja stawiznarka Serbskeho instituta, přinošk wo serbskim powójnskim šulstwje w Čěskosłowakskej wozjewiła.

Iniciator tutoho zhromadneho dźěła je dr. Friedrich Pollack: „Z partnerstwom ma Serbski institut składnosć swoje slědźenja a poskitki wo rěči a kulturje Serbow we wjetšim zwisku widźomniše činić. Zdobom wolóži zhromadne dźěło z druhimi institucijemi z wobłukow slědźenja a kulturneho posrědkowanja, wyše toho da partnerstwo nastork za nowe kooperacije.“

Wjace wo portalu Copernico

Portal poskića dwaj přistupaj: Z rešeršu dóstawaja wužiwarjo informacije wo partnerach a jich zběrkach a wobstatkach, wustajeńcach, projektach, wozjewjenjach, online-poskitkach a spěchowanskich programach. W temach namakaja wužiwarjo jednotliwe temowe ćežišća k stawiznam wuchodneje Europy a k zwiskam ze stawiznami Němskeje. Zajimowany wužiwar nadeńdźe na tutym městnje pozadkowe artikle, biografiske přinoški, komentowane žórła a interviewy abo multimedialne wobsahi. – Społnomócnjena Zwjazkoweho knježerstwa za kulturu a medije je natwar Copernico-portala spěchowała.

Dodatne informacije

profil Serbskeho instituta na Copernico-portalu
syć partnerow Copernico
Jana Piňosová (2024-12-11): „Naš puć“ (Unser Weg). Eine Jugendzeitschrift und ihre sorbischen Redakteur:innen im tschechischen Grenzgebiet 1947-1949. In: Copernico. Geschichte und kulturelles Erbe im östlichen Europa. DOI: https://doi.org/10.25355/dgf5-7p23 (28-07-2026)
Friedrich Pollack (2026-07-03): Mit der Reichsbahn in den Dschungel. Sorbenbilder im Spreewaldtourismus des frühen 20. Jahrhunderts. In: Copernico. Geschichte und kulturelles Erbe im östlichen Europa. DOI: https://doi.org/10.25355/9sr0-5y40 (28.07.2026)