Nordfreesk instituut informuje so w Serbskim instituće
Sewjerofriziski a Serbski institut skrućataj zhromadne dźěło
Na přeprošenje Serbskeho instituta w Choćebuzu wopytuja koleginy a kolegojo Sewjerofriziskeho instituta (NFI), mjez nimi direktor dr. Christoph G. Schmidt, z Bredstedta/Bräist wot 5. do 9. meje Delnju Łužicu. Delegaciju zajimuje wosebje slědźerske dźěło sorabistiskeho slědźenišća w Choćebuzu a Budyšinje. Mjez druhim zetka so z direktorom Serbskeho instituta (SI) prof. dr. Hauke Bartelsom, kiž je zdobom čłon kuratorija a towarstwa Sewjerofriziskeho instituta.
Wobaj institutaj (NFI, SI) stej jeničkej zwonkauniwersitnej wědomostnej zarjadnišći, kotrejž přeslědźitej kulturu, rěč a stawizny swojich mjeńšinow a jeje skrućenju a zdźerženju přinošujetej. Kaž delnjoserbšćina w Braniborskej je sewjerofrizišćina bjezwuwzaćnje w Schleswigsko-Holsteinskej doma. Wobě mjeńšinje chcetaj swoju rěči skrućić a zaso kruće we wšědnym dnju zakótwić.
To je jedna z přičinow za podobne wuwića we woběmaj institutomaj w najmłódšim času: Při SI załoži so wotrjad za regionalne wuwiće a mjeńšinowy škit, kotryž so mjez druhim z rěčnej politiku a rěčnym planowanjom zaběra. NFI rozšěri so wo nowy wotrjad z mjenom Liirskap, kiž ma wosebje skrućenje rěče a jeje sposrědkowanje na starosći.
Lena Terhart, wotrjadnica Liirskap wjeseli so na dźěłowy wopyt: “So zetkać je přeco dobra wěc. Jenož tak móžemy jedyn wot druheho wuknyć a wuslědźić, hdźe a kak móžemy hromadźe dźěłać.” To wopodstatni tež jeje kolega a wotrjadnik serbskeho wotrjada Lutz Laschewski: “Za našej młodej wotrjadaj je wažne, wjelelětne poćahi mjez Delnjej Łužicu a Sewjerofriziskej ze swójskimi akcentami a přinoškami wobohaćić. Je zwjeselace, zo nětko we woběmaj institutomaj z prašenjemi rěčneje politiki a wožiwjenja mjeńšinowych rěčow rozestajamy.”
Nimo wuměny na institutnej runinje wopyta NFI Rěčny centrum WITAJ a ABC (dźěłanišćo za serbske kubłanske wuwiwanje Choćebuz) a zeznajomni so z projektom ZORJA. Nimo toho wobdźěli so delegacija na konferency Serbskeho instituta, kotraž so z prašenjemi rěčneho planowanja zaběra: “Language revitalisation planning: structures and proces”, dnja 8./9. meje.
Fachowy kontakt: Měto Nowak