Wupisanje dźěłoweho městna: IT-infrastrukturowy a systemowy administrator (m/ž/d)
Serbski institut je zwonkauniwersitne slědźenišćo w Budyšinje a Choćebuzu a přeslědźuje rěč, stawizny a kulturu Serbow.
Za wotrjad Centralne wědomostne posłužby na stejnišću w Budyšinje pyta Serbski institut k 1. januarej 2027 angažowaneho sobudźěłaćerja (m/ž/d) za dźěłowy wobłuk informaciska technika. Mzda płaći so, jeli su wosobinske wuměnjenja date, hač do mzdoweje skupiny 13TV-L. Dźěłowe městno je spočatnje na dwě lěće wobmjezowane. Zběhnjenje tutoho wobmjezowanja je móžne a wotmyslene.
Waše nadawki
- wobhospodarjenje a administracija IT-infrastruktury inkl. lifecycle-managementa
- sobuskutkowanje we wobłuki přesahowacym gremiju za strategiske dalewuwiće IT
- administracija centralnych IT-systemow, wosebje tuchwilnych Microsoft-365-wokolinow kaž tež Windows- a Linuxserwerow, wirtualizaciskich platformow, cloudowych posłužbow a slědźenskeje software
- planowanje a přewjedźenje hladanskich, updatowych, backupowych a wěstotnych naprawow
- hladanje dźěłowych městnow we wobłuku IT inkl. hardware a standardneje software kaž tež podpěrowanje sobudźěłaćerjow na polu IT
- sobuskutkowanje na IT-projektach a poradźowanje institutneho nawodnistwa w prašenjach IT a digitalizacije
- zamołwitosć za datowy škit a wěstotu informacijow
Waš profil
- wotzamknjeny wysokošulski studij informatiki, hospodarskeje informatiki, informaciskeje techniki abo přirunujomneho fachoweho směra abo wotzamknjene wotpowědne powołanske wukubłanje z wjacelětnymi powołanskimi a fachowymi nazhonjenjemi we wobłuku IT
- funděrowane znajomosće w administraciji modernych IT-infrastrukturow, wosebje Microsoft-365-wokolinow kaž tež Windows- a Linuxsystemow, we wirtualizěrowanju a w kompjuterowych syćach a cloud-posłužbach
- nazhonjenja we wobłukach IT-Service-managementa, IT-wěstoty, backupowych a wobhospodarjenskich konceptow kaž tež zhromadneho dźěła z eksternymi IT-posłužbami a IT projektami
- znajomosće relewantnych narokow datoweho škita a wěstoty informacijow
- analytiske, strukturěrowane a na rozrisanjach problemow orientowane dźěłowe wašnje kaž tež wurazne orientowanje na komunikaciju a service
- zwólniwosć přiležnostneho zasadźenja tež na stejišćomaj instituta w Choćebuzu
Funkcije dźěłoweho městna dla wočakujemy přitomnosć na słužbnym městnje, we wuwzaćnych padach wobsteji móžnosć dźěłanja wot doma (homeoffice). Serbski institut poskićuje potuńšenu jězdźenku (Deutschlandticket) jako jobbowy tiket. Wočakuje Was mnohostronske a wotměnjawe dźěło w motiwowanym a interdisciplarnym teamje.
Požadanje
Serbski institut spěchuje powołanske runostajenje wšěch splahow a podpěruje wurunany poměr mjez powołanjom a swójbu. Tohodla namołwjamy wosebje žony so požadać. Při samsnej kwalifikaciji dźiwamy we wosebitej měrje na ćežkozbrašenych požadarjow.
Sćelće Waše požadanje ze zwučenymi podłožkami hač do 30.9.2026 bjezwuwzaćnje w digitalnej formje (PDF) na direktorat Serbskeho instituta z adresu si@serbski-institut.de. Wobkedźbujemy tež požadanja, kotrež pozdźišo dóńdu, njeje-li dźěłowe městno hižo wobsadźene. Kóšty w zwisku z požadanskim procesom njemóžemy Wam wurunać.
Maće-li prašenja, wobroćće so prošu rady na Johannesa Jacka: johannes.jack@serbski-institut.de.
Wjeselimy so na Waše požadanje!
Pokiw datoweho škita: Ze zapodaćom wašeho požadanja přihłosujeće předźěłanju Wašich na wosobu so poćahowacych datow w ramiku a k přewjedźenju požadanskeho procesa. Tute přizwolenje móžeće kóždyžkuli čas bjez mjenowanja přičin pisomnje abo elektronisce napřećo direktoratej cofnyć, Prošu wobkedźbujće zo tajke cofnjenje přizwolenja k tomu wjedźe, zo njemóžemy Waše požadanje w tutym procesu wjace wobkedźbować.