Aktualna kabinetna wustajeńca wo dźěławosći nakładnistwa Lusatia

termin: 04.04.2025 - 30.12.2025

Městno zarjadowanja: Serbski institut Budyšin, Dwórnišćowa 6, 02625 Budyšin

Kabinetna wustajeńca w Serbskim instituće

Přeprošujemy wutrobnje na kabinetnu wustajeńcu we fojeru před čitarnju Centralneje biblioteki Serbskeho instituta. Wustajeńca předstaji dźěławosć nakładnistwa Lusatia a jeho centralnu rólu za serbske literarne a kulturne stawizny.

Ćežišća wustajeńcy

Nakładnistwo Lusatia załoži so 1992 wot dr. Franka Stübnera, kotryž je 25 lět dołho nawjedowaše. Doniž nakładnik w lěće 2017 nahle njezemrě.

Kabinetna wustajeńca prezentuje wuběr publikacijow nakładnistwa. Hačrunjež Stübner w serbskej rěči njepublikowaše, wěnowaše so serbskim temam a zrozumi so jako posrědkowar a pósłanc bikulturneje Łužicy.

Nakładnistwo wozjewi mnohe twórby z poćahom k Hornjej Łužicy – wot fotowych zwjazkow a wjesnych chronikow hač k stawizniskim kniham a literarnym tekstam. W čitarni su nimale wšitke publikacije nakładnistwa Lusatia wustajene. Přeprošuja do čitanja a čušlenja a móža so wězo tež wupožčić.

Dr. Stübnerej bě ekscelentny lektorat wosebje wažny. Za njeho bě to wjace hač jenož korekturne čitanje: Bě to zwoprawdźenje cyłkowneho koncepta za publikacije. Dźěłaše wusko z renoměrowanymi knižnymi wuhotowarjemi a ćišćernjemi hromadźe, zo by kwalitu swojich knihow zawěsćił. Hibićiwje rozšěrjowaše swoje publikacije, pytaše direktny kontakt ke kniharnjam a prezentowaše nakładnistwo na wikach. Nimo toho organizowaše knižne čitanja, zo by twórby šěrokemu publikumej spřistupnił.

Wjeselimy so na Waš wopyt!

Wustajeńca je wulkotnu składnosć, so bliže z wuznamom nakładnistwa Lusatia kaž tež ze žiwjenskim skutkom dr. Franka Stübnera zaběrać.

Wotewrjenski čas

wot póndźele do srjedy: 9:00 – 16:00 hodź.
štwórtk: 9:00 – 18:00 hodź.
a na naprašenje