Suche Leichte Sprache Seite vorlesen Darstellung
 Suche  Leichte Sprache  Seite vorlesen  Darstellung

Jakub, Jurij (1839–1913) & Familie

Jakub, Ernst (Arnošt) Bohuwěr – Jacob, Ernst Traugott

* 16. 2. 1800 Budyšin / Bautzen
† 4. 2. 1854 Budyšin / Bautzen

Farar.

Nan Lydije Jakubec, Jurja Jakuba a Jana Bohuwěra Jakuba; 1827–1832 diakon a 1832–54 farar při Michałskej cyrkwi w Budyšinje.
Hižo wot młodych lět skutkowaše J. w serbskim kulturnym žiwjenju. W Lipsku bě sobustaw Serbskeho (Łužiskeho) prědarskeho towarstwa a jeho podstarši. 1840 sta so z naměstnikom hłowneho censora za serbske pismowstwo w měsće. Wón tež załoži wosebitu serbsku duchownisku konferencu, zarjadowa prěnje serbske bože słužby w Drježdźanach.
Prěnju přez Maćicu Serbsku wudatu knihu spisa J. hromadźe z J. Kućankom pod titulom „Serbske Hornje Łužicy abo statistiski zapisk wšitkich serbskich ewangelskich a katolskich wosadow a jich duchownych a wučerjow“ (Budyšin 1848). 1849 bu wuzwoleny na zapósłanca do Sakskeho krajneho sejma w Drježdźanach. J. běše sobuzałožer Maćicy Serbskeje a jeje městopředsyda.

ŽÓ./LIT.: J. H. Imiš. Nekrolog – Časopis Maćicy Serbskeje 8 (1855), str. 14-57; Wićaz, Handrij Zejler, str. 42 a dr.; Hartstock, Nationale Bewegung, str. 80-89, . 140-141, 158-168; J. Šołta, P. Kunze, Die Maćica Serbska in Bautzen. Ihre Stellung in der nationalen Bewegung der Lausitzer Sorben im 19. Jahrhundert – Lětopis B 26/1 (1979), str. 31-36

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984

Jakubec-Wanakowa, Lydija – Jacob, Lydia, verheiratete Wanak

* 15. 8. 1830 Budyšin / Bautzen
† 13. 12. 1895

Najstarša dźowka / najstarše dźěćo (wot pjeć) Ernsta Bohuwěra Jakuba, 1851 zmandźelenje z Jurjom Arnoštom Wanakom, mjez dr. farar w Kotecach a Wóslinku.

Jakub, Jurij – Jacob, Georg

* 24. 10. 1839 Budyšin / Bautzen
† 12. 11. 1913 Budyšin / Bautzen

Farar.

Syn Ernsta Bohuwěra Jakuba; 1870–73 kapłan a serbski prědar při Klóšterskej cyrkwi w Kamjencu, 1873–1906 farar w Njeswačidle. J. přewza po smjerći J. H. Imiša předsydstwo ewangelskeje Serbprědarskeje konferency; podpěrowaše wosebje serbske cyrkwinske prócowanja. Za zaměry kubłanja serbskich duchownych a serbskich wučerjow je wotkazał nahladne pjenježne sumy. Teologiska fakulta Lipsčanskeje uniwersity spožči jemu dostojnosć licentiata teologiae h. c. J. zastupi do Maćicy Serbskeje 1862, nachwilnje běše jeje městopředsyda.

ŽÓ./LIT.: Mrózak, Nekrolog – Časopis Maćicy Serbskeje 67 (1914), str. 80-82; Žiwjenjopis njeboh fararja Jurja Jakuba – Łužica 36 (1921), str. 37-39; Zwahr, Bauernwiderstand, str. 65, 67, 126

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984

Jakub, Jan Bohuwěr – Jacob, Johann Traugott

* 28. 7. 1849 Budyšin / Bautzen
† 28. 4. 1913 Drježdźany / Dresden

Gymnazialny profesor.

Syn Ernsta Bohuwěra Jakuba; 1874–1913 gymnazialny wučer na Kralowskim gymnaziju w Drježdźanach-Nowe město, zdobom wot 1875 kubłar kralowskich pryncow a wot 1906 studijny direktor Sakskeje pryncowskeje šule. J. staraše so wo zdźerženje serbskeho ewangelskolutherskeho knihowneho towarstwa a Drježdźanskeho serbskeho towarstwa Čornobóh. Podpěrowaše hajenje serbskeje rěče w cyrkwjach a někotre dalše serbske kulturne prócowanja wosebje z pjenježnymi darami. J. so wuznamjeni z čestnym titulom dwórski radźićel, wot 1880 běše čłon Maćicy Serbskeje.

ŽÓ./LIT.: E. Muka, Nekrolog – Časopis Maćicy Serbskeje 66 (1913), str. 136-139

Nowy biografiski słownik k stawiznam a kulturje Serbow, wud. wot: Jan Šołta, Pětr Kunze a Franc Šěn, Budyšin: Ludowe nakładnistwo Domowina, 1984